Mizoram Civil Services Sports & Cultural Association (MCSS&CA) buatsaih, ni li (4) chhung awh Annual Sports Meet 2016 chu vawiin khan buatsaih a nihna hmun R. Dengthuama Indoor Stadium, Mualpui ah Sports & Youth Services Minister Pu Zodintluanga'n a khar. He Sports Meet hi tunkar Thawhlehni (23.8.2016) khan tan niin, Mizoram Sorkar Department hrang hrang 54 atangin infiammi thahnemtakin Sports discipline 5 (Badminton, Chess, Table Tennis, Carrom leh Chinese Checker)-ah te inelna an nei a ni a. Overall Champion chu Police Department niin, PHED leh SIPMIU tangkawp chuan an dawt a, pathumna chu Education Department a ni.

Sports Minister chuan Sports Meet buatsaih a nih hian a tum ber pakhat chu Sorkar Department hrang hrang a thawktute an lo inkawmngeih a, chumi inthianthatna atang chuan mipui rawng an bawlna ah nghawng tha zawk a thlen a, chak zawka hnathawh a nih theih nana ruahman a ni, a ti a. Sorkar hna kalphungah Department hrang hrang hmalakna te chu mal kal lova, inhriatpui tawnna nena kalpui anih hian kawng tam takah awlsam zawk leh mipui tana harsatna tlem thei ang berin a thawh theih a ni, a ti a. Pu Zodintluanga chuan Sports Meet-a Medal winner leh infiammi tel zawng zawngte chu a lawmpui thu sawiin, Department hna ah pawh mi tangkai ni chhunzawm zel turin a chah bawk a ni.

Sports Meet neihna hmun R. Dengthuama Indoor Stadium chungchang sawiin Sports Minister chuan infiammi te hman tura sak anih bakah Multipurpose Hall anih angin Kohhran leh khawtlang thil pawimawh ah pawh hman theih a nih thu leh, hmang pawh an awm thin thu a sawi a. Tangkai zawka hman anih theih nan thuam that a nih chhoh zel tur thu a sawi bawk.

Sports Meet kharna inkhawm hi Pu Zothanmawia, Director, SYS in kaihruaiin, Pu Rosangliana, Administrative Officer, MSSC & General Secretary, MCSS&CA chuan a pe a. Pu K. Lalrintluanga, Addl. Director, School Education & Member, MCSS&CA chuan lawmthu sawina hun a hmang bawk.

Discipline hrang hranga result chu a hnuai a mi ang hi a ni:

1) Badminton: Category 9 (Men's Double-55, Men's Double-50, Women's Double-35, Men's Double-35, Men's Team-45 plus, Mixed Double, Women's Double, Men's Double leh Men's Single)-ah inelna awmin, Police Department chuan Gold Medal an la tam ber a. PHED leh SIPMIU tangkawpin an dawt a ni.

2) Chess: Chess ah hian Department 34 atangin player 138 an awm a. Medal tally ah pakhatna chu Education Department niin, Higher & Technical Department leh Sectt & Allied in an dawt a ni.

3) Table Tennis: Department 29 atangin player 338 an inlan a. SYS, A&T leh Taxation Department tangkawp chu pakhatna niin, PHED leh SIPMIU tangkawp chuan an dawt a ni.

4) Carrom: Department 12 atangin participant 345 telin, category 6 (Men's Team, Women's Team, Mixed Double, Men's Open Single leh Women's Open Single)-ah inelna neih a ni a. Medal tally-ah pakhatna chu Police Department niin E&F leh S&WC tangkawp in an dawt a ni.

5) Chinese Checker: Department 13 atangin player 58 an awm a. Public Works Department chu pakhatna ni in, Eco & Statistics leh Cooperation Department tangkawp chu pahnihna an ni.

Intihsiaknaa titha te hnen lawmman sem bakah hian MCSS&CA Organising Committee-a tel mek, pension mai turte hnenah ngaihhruina thilpek hlan a ni bawk.

Mizoram Civil Services Sports & Cultural Association hi 24.10.1988 khan din niin, Department of Personnel & Training, Ministry of Personnel, Public Grievances & Pensions, Govt. of India hriatpuia din, Central Civil Services & Cultural Association & Sports Board (CCSCSB)-a in affiliate a ni a. Kum tinin Mizoram Sorkar hnuaia hnathawk te tan Aizawl ah Annual Sports Meet a buatsaih thin a, Central Civil Services Sports-ah te telin, All India Civil Services Badminton Tournament 2004-05 leh 2008-09 te hlawhtling takin Aizawl ah a lo thleng tawh a ni.