Home Minister Pu Lalchamliana chuan vawiin khan Tawi tlâng Block MHIP Conference Vawi 10-na, Hriangtlâng Bûngpui Rûna neih chu khuallian niin a hmanpui a. Er.Lalrinawma, Dy.Speaker chu Khualzahawm a ni.

Vau thla tahrik ni 10 leh 11, 2020 a neih, Tawi tlang Block MHIP Conference-ah hian an thupui chu "Hmeichhiate leh naupangte hmasawnna leh himna atan nasa taka tan lak" tih a ni a. Conference Agenda 8 zinga langsar zingah, Block huam chhungah mo puan chhawm hi 25 aia tam chhawm loh turin Branch tinin hmalak ni rawh se, tih leh; Gutkha product nasa zawka do chungchangte a tel.

Khuallian Pu Lalchamliana, Home Minister chuan MHIP Conference hmanga kalkhawmte chu chibai bukin mipa tih theih ang ti ve thei tur leh mipa tluk thei tura tan la tura fuihin, mipa chunga roreltu nih erawh tum lo turin a chah a. Pathianin min zirtirna angin, 'hmeichhe lû chu mipa a ni a' tih lai hi zawm a pawimawh a ni, a ti.

Khuallian Pu Chama chuan tunhnaia hri leng mek COVID-19 chungchang sawiin, Mizo mipuite awmze neilova chi-ai lo tur leh, hri laka invenna tura Mizoram sorkar hmalakna hrang hrangte bengkhawn reng a, tha taka zawm leh tawiawm tawiawm turin a chah a. Mizoram sorkarin Mizoram Health Care Scheme a siam te zawm tha turin kalkhawm mipuite a chah bawk. Mizoram hmelma ruihhlo dona kawnga ke pen puiah MHIP te chu a sawm a. Kan fate ruihhlo laka an fihlim theihna tur leh kan fate zirna kawnga hma an sawn zel theihna tur te, an hriselna thlenga enkawl kawngah tan i la ang u, a ti.

Mizoram sorkarin hmeichhiate dinhmun chawisan a ngaih pawimawh thu pawh sawiin, Aizawl khawpui chhungah, All Women Police Station din a ni tawh a. Hmeichhia vekin an enkawl he police station hian hmeichhiate laka hleilenna leh hmeichhe case hrang hrang thleng thinah hmeichhe police hlangin an buaipui vek thei tawh a. Aizawlah chauh nilo, District dangah te pawh la din chho zel turin ngaihtuahna sen mek a ni, a ti.

Khualzahawm Er. Lalrinawma, Dy. Speaker pawhin thu sawiin Mizo nunah Mizo hmeichhiate hlutna hian hmun a chang thûk hle a, hmeichhiate zahawmna leh hlutna hi vawnghim tlat tur kan ni, a ti a. Hmeichhiate ngaihhlut zawngin mizo mipuiah nghawng thui tak a neih avangin hmeichhiate leh naupangte hmasawnna leh himna atan nasa taka tan la theuh turin kalkawmte a chah a. Natna hlauhawm HIV/AIDS dona kawngah pawh theihtawpa tan la turin kalkhawmte a fuih nghal bawk a ni.

Tawitlang Block MHIP Conference vantlang inkhawm hi Pi R.Lalpekliani, Block President-in a kaihhruai a. Palai mi 130 vel an kalkhawm. MHIP Gen. Hqrs. atangin Finance Secretary Pi Lalengkimi leh Executive Member mi pahnihin he Conference hi an hmanpui a. Vantlang inkhawm zawhah hian khawtlangin conference ruai tui tak theh zui a ni.