Aizawl District tana ni hnih awh Mizo Traditional Games 2017, Thingsulthliah Playground a buatsaih chu vawiin chawhnu khan Home Minister Pu R. Lalzirliana chuan a kharna hun a hmanpui a, inelna hrang hranga tithate hnenah lawmman a hlan bawk.

Home Minister chuan thu sawiin, pipute infiamna leh lam te hi thangthar ten kan hriat a kan thiam ve a pawimawh hle a, chumi rualin kan Pipute nun zemawi tak, an tlawmngaihna leh huaisenna te, aia upa an zahna leh, hmeichhia leh hmeithaite thlamuantu an nihna kha kan vawng nung reng tur a ni, a ti. Pipute infiamna thangtharte hriat tawh loh chawinung leh tura Sports Department hmalakna chu lawmawm a tih thu tarlang bawkin, Pu R. Lalzirliana chuan infiamna lam chi reng reng hi taksa leh rilru hrisel siamtu anih mai bakah infiammite ah inunauna tha tak siamtu a nih thu a sawi a. Chung mai bakah infiamna hmangin eizawnna ngelnghet a neih theihzia chu kan Mizo thalai I-league player-te atang te hiain a chiang hle a ni, a ti a. Thalai kalkhawm te chu chungah inelna hlawhtling tak neih theih nana an tha thawh avanga lawmthu a sawi bawk.

Mizo Traditional Games hi Mizoram District hrang hrangah neih niin, Aizawl District-ah chuan Thingsulthliah ah hian nghah a ni a. He Games hi Sorkar laipuia Ministry of Tribal Affairs hnuaia Vanbandhu Kalyan Yojana (VKY) hmalakna kaltlanga Mizoram Sports & Youth Services Department buatsaih a ni a. Nikum 2016 November thla khan District Headquarter theuhvah  neih a lo ni tawh a ni.

Vawiin Traditional Games kharna hun hi Pu Vanlalruata, State Adventure Organizer, SYS Directorate chuan a kaihruai a. Inelna hrang hrang pariat - Mizo inbuan, In suknawr, Insaihruipawh, Kalchhet Intlansiak, Ketaminu Intlansiak, Kawi Inkahsiak, Sairawkherh Inperhsiak leh Arpa Insual ah te titha pathum theuh thlan chhuah niin, pawisafai leh certificate pek theuh an nih bakah consolation prize pakhat theuh siam a ni a. Minister hian Thingsulthliah-a High School leh Middle School paruk te hnenah leh Thingsulthliah Games and Sports Association hnenah Volleyball leh net a hlan bawk.