Nimin  khan Lawngtlai DC bul tuma Nehru Yuva Kendra (NYK), Lawngtlai leh MHIP, Electric Veng Branch, Lawngtlai te tang kawp buatsaih sikul chawlh hun awl hnawh khah nana naupangte'n Karate an zirna chu District Sports Centre, Electric Veng, Lawngtlaiah a kharna hun hman a ni.

He huna Khuallian, LADC-a Sports Officer Pu Thathluna chuan thu sawiin, mahni inrin tawkna nei turin thiam thil eng emaw tal neih a ngai a, Karate an zir chuan naupangteah awmzia a nei hle dawn a ni, a ti a. Lawngtlaiah Karate chu tihlar zel thaa a hriat thu leh Association pawh din thuai ni se a duh thu a sawi bawk.

He hun hi NYK - SUTP Instructor Pi F.Zodinpuii'n kaihruaiin, Electric Veng Branch MHIP Assistant Secretary Pi J.Lalremruati'n inlawmna thu a sawi a. Khual zahawm, RMSA DPC Pu C.Lalrinchhana bakah, Lawngtlai DHO Pu L.Lalhmingmawia Pachuau, Electric Veng VCP Pu K.Laldinmawia, Electric Veng YLA Vice President Pu R. Lalduhawma te pawhin thu an sawi a. Karate zirlai naupangte'n an thiam an entir bakah, zaithiamte an zai a. NYK District Youth Co-ordinator Pi Mercy Sellate-in lawm thu sawiin hun a khar.

He Karate zirna hi December ni 16, 2016 atang khan tan niin, naupangte sikul chawlh hun awl hman that nana buatsaih a ni a. Naupang sawmruk chuangin an zir chhuak a ni.

Attachment

  • Loading attachment...