Home Minister Pu R.Lalzirliana chuan Nl.Lalhriatpuii, Chhinga Veng ni 12.09.2017 a Bagha a thi a chhar chungchanga hmalakna te ngaihvenin vawiin khan a ruang chharna hmun a tlawh.

Home Minister chuan mizo nula Bagha a boral chungchanga  Bagha YMA te hmalakna leh an lo tuamhlawm dan chu lawmawm a tih thu a sawi a. Thil tisualtu chhuichhuah ngei chu a duhdan a nih thu sawiin,  Cachar SP leh a thawhpuite hmalakna pawh a fak a. Home Minister hian Cachar SP Rakesh Roushan chu a hranpa a kawmin an hmalakna leh an thlenchin a zawh bakah Mizo mipui in Cachar police hmalakna ah beiseina sangtak an neih thu a hrilh a. Cachar SP leh Kolasib SP hian an hmalakna te an inhrilh tawn reng tur thu Home Minister hi an lo hrilh a ni.

Home Minister hi Pu Joseph Lalchhuana, DIG (NR&SR), Pu R Zarzosanga, Deputy Commissioner Kolasib leh Pu Abhishek Dhania, SP Kolasib te bakah NGO ten an tawiawm a ni.