3521/2024-2025

Aizawl, December ni 13,2024: Vawiin tlai khan Home Minister Pu K. Sapdanga chuan 1st Bn. MAP Ground, Armed Vengah ah Mizoram Police Sports Meet vawi 22 kharna hun chu khuallian niin a hmanpui. He Sports Meet hi November ni 3, 2024 khan neih tan a ni.

Khuallian Home Minister chuan Sports Meet participant zawng zawng chungah leh ruahmanna siamtute chungah lawmthu a sawi. Mizoram Police chuan ram leh hnam hmelma ruihtheihthil hluar zel tur danna atan tha thlah lo a hma a lak zel thu sawiin, kuminah November thla thlenga ruihhlo leh dan phallo thil hrang hrang man dan dinhmun a tarlangin ram leh mipui him zawkna atana an thawh that chungah lawmthu a sawi. Minister chuan police te tan fitness a pawimawhzia sawiin tunhnaia Mizoram Police ten state chhung leh pawn, India ram pawn thlenga sports discipline hrang hrangah hlawhtlinna an chang thei chu fakawm a ti a. Taksa insawizawina lama intuaitharna leh police ten taksa hrisel an neih theihna tur atan August ni 5, 2024 atang khan ‘45 Minutes For All Ranks Of Mizoram Police’ tih lo tan tawh chuan Mizoram Police te taksa fitness-ah leh discipline vawn kawngah pawh hma a tihsawn zel kan beisei thu a sawi.

Minister chuan ni 21.08.2024-a DP&AR in sawrkar hnathawkte hna thawh that leh that loh enna Periodical Review neih dan tur inkaihhruaina Office Memorundum a lo chhuah tawh chungchang sawiin, kan police te pawh he kan fitness programme-in a kaihthawh zawh loh khawp a hna thawk theilo kan awm chuan a hun hmaa chawlh tir, premature retirement, thleng pawhin hma kan la zel ang, a ti a ni. Halpuah leh halmawi khapna khauh taka ken kawh a nih tur thu sawi bawkin, a bik takin sawrkar hnathawk te chu he thupek hi bawhchhe lo turin a chah a bawk.

He hunah hian Pi Meenu Choudhary, IGP (Intelligence) chuan thu sawi bawkin, hun reilote chhungin discipline hrang hranga infiamna felfai taka nei a an zo thei chu lawmawm a ti a. Sports & Youth Service Department, SAI leh pawl dang dangte chungah he sports meet atana an hmunhma leh bungrua te an hman tir avangin lawmthu a sawi bawk a ni.

He sports meet-ah hian contingent 12 ah inthen in infiammi sang chuang in sports discipline 18 ah an inel a. PHQ (PHQ, Security, CID SB & Crime, Cyber Crime, Spl. Narcotics, Lok Ayukta, Sports Dept., MSSC & Secretariat) chu overall champion a ni a, Central Range (Aizawl, Saitual DEF & Traffic) chu pahnihna niin Red Group (MPRO, F&ES, ACB, FSL & DM&R)Group chu pathumna a ni.

Tun hnaia Mizoram Police in infiamna lama lawmman a lo dawn tawhna te chu hengte hi a ni:

i) Yonex Sunrise Indian Master Ranking Tournament-2024 - Bronze Medal

ii) 16^th All India Police Badminton Championship-2024 - Runner Up

iii) 9^th All India Police Judo Cluster-2024 - Bronze Medal

iv) 73^rd All India Police Wrestling Cluster-2024 - Gold Medal (2)

v) Independence Day Football Tournament 2024, Aizawl - Champion

vi) Mizoram Premier League Season 11 (2024-25) ah Runners-up

vii) India ram tan Asian Open Police Taekwondo Championship, Vietnam a neih ah Constable Lalruatkima chuan Senior-2 Poomsea (above 35 yrs) category ah Gold Medal a la.