3520/2024-2025

Dates Hnahthial, the 13th December, 2024: Vawiin chawhnu dar 1 khan Excise & Narcotics Minister, Pu Lalnghinglova Hmar chuan Hnahthial District a Excise & Narcotics Station hawnna programme-ah khuallian niin station thar chu a hawng a. South Tuipui Bialtu MLA, Pu Jeje Lalpekhlua chuan khual zahawm ni a hmanpuiin Excise & Narcotics Secretary, Pu Lalramsanga Sailo, IRS chuan he hun hi a kaihruai a ni.

Minister chuan Hnahthial district chhungah sum leh pai indaihlohna kara Excise & Narcotics Station hawn theih a ni chu thil lawmawm tak anih thu sawiin tun sawrkarin ruihhlo do a ngaih pawimawhzia lan chhuahna lian tak anih thu a sawi a. Theihtawpin ruihhlo do nan Excise department chu sawrkarin thawm that a tum thu sawiin tun dinhmunah pawh Sub Inspector, Assistant Sub Inspector,  Constable leh Group-D te pawh lak belh turin an inbuatsaih mek a ni a ti a. Lirthei an indaihlohna te hriain sawrkar chuan Lirthei, Four-wheeler sawm pali (14) leh Two wheeler pali (4) lakna tur a tihfel tawh thu a sawi a. Hetia thawmthat hi an nawmsakna tur ni lovin an hna tha zawka an thawh theihna tur a ni tiin ruihhlo donna kawngah Hnahthial mipuite puitu a nih theih ngei a beisei thu a sawi a ni.

Ruihhlo, a bikin Heroine leh No. 4 kan tihte hi mi neinung fate ai mah chuan mi rethei faten an tih nasat thu sawiin chu chuan harsatna a thlen nasa lehzual thin a ni a ti a. Hnam dangin kan thalai pakhat pawh that ta se rilru na tak chunga kan haw tur ang bawk hian kan ram thalaite suatu, hnathawk thei lo leh ramtui lei lova kan thalai sing tel siamtu, ruihhlo hi kan huat a, kan do rawn a tul takzet a ni a ti a. Hemi ruihhlo do tur hian Excise chauh chuan an do hneh zo dawn lo a ni tiin NGO leh a bikin kohhran hruaitute chu thawhhopuiah a sawm nghal bawk a ni.

Bialtu MLA, Pu Jeje Lalpekhlua chuan MLA a nihna ang ni lovin Hnahthial mi leh sa a nihna ang zawkin Excise department rawn awm tur chu lawmawm a tih thu a sawi a. He department hian Hnahthial tan rah tha a chhuah ngei a beisei thu sawiin ruihhlo dona kawngah nasa taka Hnahthialin hma a sawn phah a beisei a ni a ti a. Office hour zah lova officer ruihhlovin a tihbuai ang hi an awm loh a beisei thu a sawi bawk. Ruihhlo la ti ve lo te venhim an pawimawh a ni tiin chhungkaw tam tak rumna chhan hi hneh turin District leh ram tan theihtawp chhuah turin Excise department-a hnathawktute bakah Hnahthial mipui zawng zawngte chu a sawm a ni.

Excise Commissioner, Pu Z. Lalhmangaiha chuan he hunah hian thu sawiin Ministry lam ngaihsakna vangin Excise department chuan bung thar an chuang kai ta chu lawmawm a tih thu a sawi a. Tun dinhmunah hian District tinah station an hawn kim tak thu sawiin Hnahthial, Lawngtlai, Saitual leh Khawzawl tih lovah chuan District tinah Assistant Comissioner in a ho tawh thu a sawi a. Excise & Narcotics Department chu MLTP Act, NDPS Act leh Autonomous District Council-ah Mizoram Excise Act, 1973 hmanga zu leh ruihhlo khapna dan kengkawhtu an nih thu sawiin an department chuan zu leh ruihhlo dona kawngah Hnahthial district tan pawh theihtawp an chhuah tur thu a sawi a ni.

Excise & Narcotics Department Station hi tun hnaiah District pathum - Saitual, Khawzawl leh Hnahthial ah te hawn thar an ni a. Hnahthial District station hi Inspector pakhat(1) leh staff panga (5) ten an thutchilh ang.

Programme-ah hian Ruihhlo do beihpui thlakna, Nasha Mukt Bharat Abhiyaan puala intihsiakna a lawmman dawngtute hnenah lawmman hlanna neih nghal a ni a.

Reels Making Competition-a lawmman hlan te chu :-

1st Prize:- Andrew Lalfakawma 

2nd Prize:- Maruata Boitlung 

3rd Prize:- TC Lalmuanthanga 

Newspaper Editorial-a Ruihhlo do chungchang chhuah tha lawmman dawngte chu :-

1st Prize :- Calathea chanchinbu 

2nd Prize:- Kailawn chanchinbu 

3rd Prize :- Hnahthial Times chanchinbu

He hawnna programme-ah hian Hnahthial khaw chhunga Head of Office-te, khawtlang, NGO leh kohhran hruaitute bakah thuthar lakhawmtute an tel a ni.