Nimin khan YMA Day vawi 74-na chu Mizoram pumah khawtlang thatna tur leh intihhlimna chi hrang hranga hman a nih laiin Saitual Venglai leh Seling Branch ten he Ni an hmanna chu Home Minister Pu R. Lalzirliana’n a telpui a. Saitual Vengla-ah hian MLA LADS Works (2008-09) hmanga YMA bungrua dahkhawmna in chu a hawng nghal a ni

 

 

Saitual leh Seling-a YMA Day a hmannaah hian Home Minister chuan thu sawiin YMA chu a tobul rengah missionary kutchhuak a nih avangin pawl tlo leh innghahna tlak a ni a, tun thlenga Mizo nun tinuam leh ti thlamuangtu chu YMA hi a ni, a ti. YMA innghahna thupui tarlangin hun awl hmanthat tih hian hun vawn dik leh thil a hun leh hmun dik taka tih thin a kawk a ni a ti a, Kristian nundan tha ngaihsan tih hi kan rinna nen inkawp tlat a nih avangin kan nitin nunah Isua zirtirnate chu kan nunpui tlat tur a ni a ti bawk. Zoram hmasawnna tura sorkarin hmachhawp a siamte tawiawm leh tipuitling tura tanlak pawh chu YMA thupui zing ami a ni bawk Home Minister chuan a ti. Ruihlo chi hrang hrang dona kawnga YMA te hmalakna a thlawp thu sawichhuakin Pu R.Lalzirliana chuan tha thlah lova Zoram thalai nun siamtha tura bei chhunzawm zel turin YMA memebrte chu a fuih a ni.

Home Minister chuan Seling chu kawngpui pengthuam pawimawh tak a nih avangin leh sorkarah pawh an lo thlen tawh hre rengin Police Outpost dah thuai a nih tur thu a sawi.

Saitual Joint YMA te chuan YMA Day pual hian CM Relief Fund-ah Rs.1000/- chu Home Minister kutah hian an hlan a ni.