Green Mizoram Day, vawiina Mizorama hman chu, state capital Aizawl chuan Referral Hospital Complex, Falkawn-ah Ceremonial Tree Planting Programme, Chief Minister Pu Lal Thanhawla hova hman a ni.
 
 
Chief Minister chuan kan ram hi kan tichereu nasa tawh a, ramngawte, chungleng savate leh kan luia sanghate kan tichereu a; hetiang renga kan kal chuan thlalerah kan siam anga, chhuan lokal leh zel tur ten anchhia min lawh ang tih a hlauhawm a ni a ti a. Chuvangin vawiin ni hi kan tan ni pawimawh tak a ni tih hi I hre reng ang u a ti. Ramngaw leh nungcha kan tihchereu mekte hi a tlai hmain, neitu rilru nen, a siam that hna kan thawh angai a ni a ti a. Tam tak thingtiak phun aiin tlem deuh tih puitlin a pawimawh zawk a ni tiin, a phun kan phur ang thovin a puitlin thlenga a enkawl chhohah phur ila, hlawhtlinna kan hmu ang Pu Hawla chuan a ti. Chuvangin ramsate, savate, kan lui sanghate leh ramngaw kan tih chereu avanga kan lui tui kang chat tawhte kan kohkir theih nan, thingtiak kan phunte hi a tih puitlin kawngah mitinin mawh kan phur a ni a ti.

Ram hnuaia rawtuai khawrhtute leh meihawl rawh thin chungchang sawiin, Pu Lal Thanhawla chuan heng titute hi an sual vang nilovin, an mamawh zawk vanga ti an ni a. Chuvangin a man thei tu ten bazarah man lovin, an tihna hmunah man thin zawk se tiin, ‘Market Guard’ nilovin Forest Guard ni turin a chah a ni

Chief Minister chuan inhlawhna chungchang sawiin, Mizoram leilung fa nilo, englai pawha  nuai khat leh a chanve vel awmte hian inhlawhna an hmuh reng laia, ram chhung leilung fa ten eizawnna a harsa, hnathawh tur a awmlo ti titute hi inenchianga, tan an lak a ngai a ni a ti a. Hetiang renga kan awm anih chuan midangte chimral theihah kan indah tihna a ni a ti. Chuvangin engmah thawh hreh nei lova, taimak zir turin mitin a chah a ni.

Chief Minister chuan Referral Hospital chu central sorkar remtihpuina angin sak chhunzawm anih tur thu a sawi bawk.

Inkhawm kaihruaitu Pu H.Rohluna, Minister for E & F etc. chuan Kum 1989 a Green Aizawl tih din atanga kum1999 ah Mizoram pum huapa Green Mizoram tia bul tan anih thu a sawi a. He Ni kan hmanna chhan  pawimawh tak chu ramngaw, thing leh mau leh a chhunga cheng nungchate humhalh bakah Mizoram hi thing in a tuam zat hi 0.58 % chauh anih avanga thing tak tih pun a ni a ti.

He ni hian kangmei venna kawnga titha 3 te hnanah Chief Minister chuan lawmman a hlan a. 1st prize dawngtu Saiha Districtin Rs.20,000, Certificate leh BRTF running trophy, 2nd prize ah Kolasib District – Rs.15,000 leh Certificate leh 3rd prize ah Aizawl Districtin Rs.10,000 leh Certificate te a ni a. District tina khua titha 3 thlanchhuahte hnenah lawmman a sem bawk a. Heng bakah kangmei lam kaihhnawih thuziak chhuah tha,  Aizawl nitin chanchinbu ti tha 3 te  hnenah lawmman CM hian a sem bawk a. Chungte chu pakhatna Vanglaini (Rs.5000), Pahnihna Aizawl Post (Rs. 3000) leh The Zozam Times (Rs.2000) te an ni.

Inkhawmna hmun, Referral Hospital Complex ah hian thingtiak hmun 31 ah VIP leh officials ten an phun a. Melthum leh Falkawn inkarah Department tin ten thingtiak 25 zel hmun pekah an phun bawk. Mimal thing phun ve duhte tan ni 18 June hnu lamah DFO Office ah dil theih a ni ang.

Inkhawm hi State Level Committee on Green Mizoram Vice Chairman Pu H.Rohluna, Minister for E & F etc. in a kaihruai a . Ministers, Speaker, Parliamentary Secretaries, MLA, MP(LS), MP(RS), Officials leh mipui an kal thahnem hle a ni.
 
 

Attachment

  • Loading attachment...