Vawiin chawhma khan Secretariat Conference Hall-ah Home Minister Pu R.Lalzirliana kaihruaina hnuaiah meeting pawimawh tak neih a ni a. He hunah hian Mizoram atanga Tripura a Bru(Reang) pemte; Mizoram a hruaikir leh tura  sawrkar hma lakna kal mek chungchangah, Mizoram a recognised Political party hrang hrang te leh NGO pawl hrang hrangte nen inrawn tlanna neih a ni.

Meeting-ah hian - Reang(Bru) te tana Summary Electoral Roll Revision Relief Camp a neih chungchang leh  Government of India, Government of Mizoram, Government of Tripura leh MBDPF te inremna ziah anga Dt.14. 08.2018 atanga Reang(Bru) pemte hruaikir hna tan tura Sawrkar ruahmanna chungchang te te Home Minister Pu R.Lalzirliana chuan a sawifiah hmasa a. Hun hmasa lam a hmalak tawhna te leh tuna hmalakna kalmek te Home Minister chuan  sawiin Mizoram sawrkar duhdan leh Mizo mipuite duhdan chu a danglam lo a ti.

Mizoram chhungah ngei Bru rawn kir leh duh te tan Summary Electoral Roll Revision leh Vote thlak chu sawrkar dinna leh duhdan a ni a ti a. Hemi chungchangah hian Chief Minister Pu Lal Thanhawla pawhin Ministry of Home Affairs(MHA) leh Election Commission of India(ECI) hnenah lehkha thawn tawhin Mizoram mipui leh sawrkar duhdan a thuhmun tih chiang taka ziakin Mizoram chhungah ngei E/Roll Revision leh Vote thlak chu Mizoram sawrkar duhdan a ni tih a thlen tawh tih a sawi a. Chief Secretary leh Principal Secretary, Home te pawn Mizoram tanchhan te theihtawp chhuahin ECI chu vawi 3 lai an sawipui tawh a ti a.  ECI thutlukna hnuhnungberah  chuan Bru pem te tan, Summary E/Roll Revision chu Tripura Relief Camp-ah neih tur tih leh Vote thlak chu  Mizoramah tih a ni a.  Mizoram sawrkar duhdan ni lo mahse, inthlang ram kan nih angin inthlanna kaihhnawih a thuneitu sang ber ECI thupek anga  Mizoram sawrkar chuan hma a lak tak mai a ngai a ni a ti.  

Mizoram atanga Tripura a pem, Bru te hruaikir leh chungchanga inrawn khawmnaah hian Joint NGOs Coordination Committee, Central YMA, MHIP, MUP, MZP, MSU, MPCC, MNF, ZNP, MPC, BJP leh MJA ten an pawl theuh aiawh tute an rawn tir a. Sawrkar lam atangin Home Principal Secretary Pu Lalnunmawia Chuaungo leh Home Department a hotute, DGP Pu Balaji Srivastava, IGP(L&O) Pu LH Shanliana, Home Additional Secretary Pu Lalbiakzama, CID(SB) SP Rodingliana Chawngthu, Pu David L Thangliana, Director, I&PR leh sawmbik mi pawimawhte an tel a ni. Meeting-ah hian Home Minister sawmna angin Reang(Bru) te tana Summary Electoral Roll Revision chungchang leh Bru Repatriation & Rehabilitation from Tripura to Mizoram indawrna chungchanga Mizoram sawrkar aiawhtute atangin Home Principal Secretary Pu Lalnunmawia Chuaungo bakah Home Additional Secretay Pu Lalbiakzama ten report kimchang takin an pe a. Hemi hnu hian sawihona, rawtna, ngaihdan sawina hun, zawhna leh chhanna hun neih chhunzawm a ni a. Tluang tak leh rilru in hmu tlang taka meeting hi neih niin Reang(Bru) te tana Summary Electoral Roll Revision chungchanga he meetinga kalkhawm te thutlukna chu Election Commission of India(ECI)  hnenah Mizoram sawrkarin thlen leh ni se tiin rel a ni.

Reang(Bru) pemte hruaikir tura hmalakna kalzelah naktuk hian Home Principal Secretary Pu Lalnunmawia Chuaungo kaihruaiin Home Department Official te, I&PR  Official te leh concerned District official te chu Aizawl atangin Damcherra, Tripura-ah hna pawimawh thawk turin an kal dawn a. Anni hi  Monitoring Committee Meeting naktip - August 10, 2018 a Damcherra, Tripura a neih turah Mizoram aiawh a Monitoring Committee member dang  CYMA President Pu Vanlalruata chuan a zu zawm dawn a ni.

Dt. 3.7.2018-ah khan  GOI, GOM, GOT leh MBDPF te'n Assembly 2018 inthlan hma a Bru te Mizorama lo kir leh tur in Inremna Thuthlung an ziak a. He Inremna Thuthlung ziah hnu hian Mizoram Sawrkar chuan September, 2018 thla chhung ngei a Mizoram a hruaikir an nih theihna turin Action leh Movement Plan a siam a. He ruahmanna hi ECI duhdan angin 14th August, 2018 atanga tan in 10th September, 2018 ah zo hman tura ruahman a ni.Road Map - IV angin chhungkaw 3455 laklet leh nan a summawh zat MHA a thlen chu Rs 68.60 Crore a ni a. Indentification , November 2016 a neih a nih hnuah Bru chhungkaw  laklet tur zat chu 5407  a lo ni ta a. Sum mamawh zat a pun avangin senso zat tura ngaih Rs 68.60 Crore chu  Rs 121.3 Crore a siam that niin MHA-ah thlen a ni a. Sawrkar laipui remtihna nghah mek a ni. Bru chhungkaw pemte hruaikir leh an nih huna an awmna tur khua pawh, Mamit, Lunglei leh Kolasib DC-te theuh in an ruahman fel tawh a. Mamit District-ah khaw 46, Lunglei District-ah khaw 4 leh Kolasib District-ah khaw 40 te an ni.