Home Minister Pu R. Lalzirliana leh Excise Minister Pu J.H. Rothuama ten vawiin tlai dar 3:00PM khan Administrative Training Institute (ATI) buatsaih ni hnih awh "Training on ND&PS Act, MLTP Act, ADC Act etc for NGOs, Police and Excise Personnel" kharna an hmanpui.

Khuallian Pu R. Lalzirliana chuan MLTP Act chu ennawn tum mek a ni a ti a; siamthat ngai a awm a nih chuan siamtha turin ram leh hnam te, khawtlang te, chhungkua leh mimal nun te kawng hrang hranga a nghawng dan zir chian hmasak a tul tih a sawi. Ruihhloin kan ram a tihchhiat kan phal tur a ni lo tih sawiin ram leh hnam tana thawktu mi tinten tangruala kan beih chuan beiseina a awm a ni a ti a. Ram leh hnam tana hma kan lakna hi mipui tam ber tan a tangkai em tih ngaihtuah chungin tan kan la sauh sauh tur a ni a ti bawk.

Excise Minister Pu J.H. Rothuama chuan kan chhehvela ram dang atangin ruihhlo a lo lut nasa a, hemi ven hna hi a hautak hle a ni tih sawiin Central YMA hmalakna a fak a. Mizoram Police leh Excise te pawh an thawk tha hle a ni tiin hremna hi a na tawk lova, hremna khauh leh na zawka lek dan zawn a tul tih a sawi a. Thalaite venna atana hmalak ho hi a pawimawh tih sawiin ruihhlo man tute leh an chungchang relsaktute hi tan rual a ngai a ti bawk.

Ni 28 & 29 June, 2011 chhung awh he training-ah Narcotic Drugs and Psychotropic Substances Act chungchang te, Mizoram Liqour Total Prohibition Act leh Assam Drugs (Control) Act chungchang te zir ho a ni a. He training kharna ATI Auditorium, New Secretariat Complex-a hman hi Pu R. Lalvena IAS, Director, ATI in a kaihruai a. Training-a tel te hnen atangin feedback ngaihthlak a ni a; Mizoram Drugs Control Act neih ve a hun tawh zia te, Police leh Excise tih chak a tul thu te, court rorel kalphung thenkhat - finfiahna chiang leh thuhretu awm loh avanga duh anga hremna lek theih a nih loh dan te leh ruihhlo dona atana mamawh leh hmabakte sawi a ni.