Nimin chawhnu khan Food, Civil Supplies & Consumer Affairs Minister leh Ngopa bialtu ni bawk Pu H Rohluna chuan NE Khawdungsei-ah tui dahkhawlna (RCC Water Reservior) leh Primary Health Centre (PHC) a Isolation Ward sak thar te chu a hawng a. RCC Water Reservior hi ni za inhlawhna (MGNREGS) atanga siam niin tui litre nuai 12,01,400 a dawng thei a. PHC a Isolation Ward hi MLA Local Area Development Fund atanga sak a ni.

Pu H Rohluna chuan ni za inhlawhna kaltlanga hetiang tuizem lian khawtlangin an sak chu khawtlang tan ro tling a nih thu sawiin tuizem sak a nih theih nana khawtlang hruiatute inpumpekna leh thahnemngaihna chu a ropui a ni a ti. Minister hian Sorkar-in Tuivai Hydel Project, Tuirial Hydel Project leh Kolodyne Multi Modal Project te ah te thui tak hmalak a nih thu sawiin heng Project te a puitlin hunah Mizoram tan ro tling ropui an nih a beisei thu a sawi.
 
RCC Reservior sak nan hian Job Card hmanga inhlawhna leh a material component te belhkawmin cheng nuai 34,02,700 vel sen a ni a. Tanky hi feet 12  a thuk niin a diameter chu feet 60 a sei a ni a; tui litre nuai 12,01,400 a dawng thei tura siam a ni.
 
Vawiin khan Pawlrang ah chhungkaw 197 leh Hliappui ah chhungkaw 336 te hnenah Forest Department hnuaia ruahmanna 'Ensuring People's Participation in Management and Conservation of Forest Incentive Schemes' kaltlangin Minister hian pressure cooker a sem bawk. He Scheme hmang hian Ramngaw humhalh kawnga thawk tha leh thing leh mau ti chereu lova mahni khaw daia forest reserve te veng a, enkawlzui tha khuate hnenah an thawh that vanga pek a ni.

A zinah hian Minister hi PHE Department; Environment & Forest Department; Food, Civil Supplies & Consumer Affairs Department; PWD; I & PR aiawh te leh BDO Ngopa Block ten an tawiawm a ni.