Vawiin chawhma khan G.S. Arya Mess, PHQ, Aizawl ah Home Minister Pu Lalchamliana leh Mizoram Police Department a hotuten inkawmna hun an nei a, Mizoram district tin atang leh Unit hrang hrang hotute an tel a ni. He hun hi Pu John Neihlaia, IPS, IGP (PHQ) in a kaihhruai a, Pu LH Shanliana, IPS, IGP (Intelligence and Law & Order) in Mizoram Police Department dinhmun tlangpuite tar langin, Police officer te hnathawhna kawnga harsatna leh hmasawnna turte sawi hona hun neih a ni bawk.

Home Minister Pu Lalchamliana chuan,”Boruak muanawm tak hnuaia Inthlanna neih anih theih nan a Mizoram Police te hnathawh leh hmalaknaah lawmthu ka sawi hmasa duh a ni,” a ti a,”Mizoram Police te chu sawrkarin Zu zawrh khap a tumna kawngah pawh a thawktu pawimawhberte zinga mi kan nih dawn avangin uluk taka kan in buatsaih a tul hle a ni”, a ti bawk. Home Minister chuan ,”Police te chu Dan leh thupek kengkawhtu anni a, heng hnate hi tha taka kalpui tur chuan thawh hona tha, mahni inthunun theihna leh mipuite nena thawh ho zung zung theih hi a pawimawh hle a, khawvel changkanna ina a ken tel Information Communication technology lamah te hma sawn tum a inzirtir thar zel hi a tul hle a ni,” a ti. Pu Lalchamliana chuan rami venhim chu ngaihpawimawh zual tha a tih thu sawiin,  Police te an hna thawhna hmun a quarter awmna tur indaihlohna leh hmeichhe police tlem avanga thupek kenkawh angaih changa harsatna awm thin te chu a tul anga hma lak anih tur thu sawiin Police department hnuaia mihring indaihlohna tam tak awm chu a hnawhkhah dan ngaihtuah a nih tur thu a sawi bawk. Home minister chuan Police te chu inenkawl uluka hriselnate ngai pawihmawh turin a chah a, mahni inchengvawng tak chung leh  eirukna a fihlim tlat turin a fuih bawk.

He hunah hian Police Officer te chuan an hmalaknate leh an hnathawhnaa harsatna an neih hrang hrang sawina hun an neih hnuah Pu Joseph Lalchhuana, IPS, DIGP (Training) in lawmthu sawina hun a hmanga Home minister Pu Lalchamliana chu PHQ hmun an fang kualpui nghal bawk.