No.2720/2021-2022

Aizawl, the 26th October 2021: Krismas leh Kumthar vuakvetah boruak hrisel a awm theih na tur te, bengchheng a awm loh na tur leh kangmei chhuak thei te laka kan him tlanna turin nizan khan CYMA buatsaihin Vanapa Hall-ah inzirtirna neih a ni a. He hun hi Home Minister Pu Lalchamliana pawhin a hmanpui a ni. Central YMA huaihawt inzirtirna hunah hian Aizawl khawpui leh chhevela Branch YMA hruaitute an tel tha hle a - kan hunpui laia halpuah, halmawi, silai lem mu nei leh kep kahpuah chi bakah sky lantern hal leh chelek khap pawimawhna te leh khap a tul na chhan te inzirtir leh sawiho a ni.

Home Minister Pu Lalchamliana chuan Halpuah leh Halmawi te, Silai lem mu nei chi etc,.te chu mipui hriselna atana tha lo leh thil hnawksak tak, thil pawi thlen thei, kan chin dawklak mai mai leh sum tamtak sen ralna ni bawk si a ni a ti a. He thil tha lo tak khapna chu sawrkarin khauh taka kalpui a tum thu te a sawi hmasa a. He hmalakna nikum lama kalpui dan te, dan bawhchhia te hrem an nih dan te leh kumina khauh zawka khap tum a nih tur thu te a sawi a ni.

Home Minister chuan October ni 11 khan he hmalakna atan hian DGP Conference Hall, PHQ-ah meeting neih a ni a. Kumin / kan hma lawka Krismas leh Kumthar vuakvetah hian Halpuah leh Halmawi te, Silai lem mu nei chi te, Sky Lantern (Zopa rocket) hal loh ni se tiin rel a nih thu a sawi a. Nikum khan halpuah/halmawi hal nia hriat chian theih chin te chu case te siam sakin bawhzui a ni a, thiamloh chantit te pawh tam tak awmin hrem an ni tawh a ti.

Kuminah khauh zawka hmalak tum a ni a, he hmalakna atana bul tan nan Aizawl District Bawrhsap pawhin October 13 khan Khapna Thupek a chhuah tawh a. Home Department pawhin DC thupek hi a bawh zui nghal a, checking te a tul ang kalpui niin SP, Aizawl hnuaiah khapna dan te kengkawh turin Special Cell din a ni tawh bawk a ni a ti. Dan hnuaiah mitin te kan in ang tlang vek a ni tih a sawi a. YMA chuan sawrkar tha taka a lo thawhpui thin tawh angin tunah pawh thawhho a ni leh ta chu lawmawm a tih thu a sawi a. Dan bawhchhiate hrem an nih theih nan dan leh thupek kengkawhtute hnenah dan bawhchhia a piang chu tumah thliar hrang lova report thin tur leh mipui zirtirna kawngah YMA chu sawrkarin a ring tawk a, a thlawp bawk a ni a ti a. Halpuah, Halmawi leh a dangte khapna chungchangah kawhmawh bawl apiangte chu an dinhmun leh an nihna emaw hnathawh avanga an pawimawhna lam zah sak lovin dan bawhchhia an nihna angin hrem an ni ang a ti.

Home Minister chuan Gate nei Department hrang hrang te chu halpuah leh halmawi rawn phurh luh tum an awm em tih uluk taka lo check thin turin a ngen a. Dawrkai te pawh heng khap thil te hi zuar lo turin a ngen bawk a. Police te leh YMA lam te pawhin uluk takin an check dawn tih a sawi a. Chutihrualin, check dawn vang pawh ni chuang lovin Sawrkarin mipuite himna atan leh thil tha zawk tur a buaipui a nih avang hian tha taka zawm mai turin mi tinte a ngen tih a sawi a ni. Home Minister chuan Sawrkar hna thawk lian te leh dawrkai lian te, Contractor leh eizawnna hrang hrang avanga hmelhriat nei tha te pawh phai lama an dawr thin ten thilpek atana rawn pek an tum pawhin lo hnar mai turin a ngen bawk a ni.

Nikum atanga Covid-19 vanga buai kan ni a boruak hrisello siam belh chu kan tan a pawi thei tih a sawi a. Kan hriselna tur ngaihtuahin khap vang pawh ni lovin hal lo thei tura insum tlang thei turin rilru kan insiam theuh a tul hle a ni a ti. Heng chungchang sawifiahna leh mipuite ngenna te pawh I&PR Department hma laknain Health Department lama kan mithiamte nen TV lamah te sawihona programme te neih tum a ni mek tih a sawi a.

Home Minister Pu Lalchamliana chuan Halpuah leh halmawi te kan hal hun chhung darkar khat bawr vela kan nuam tihna chuan a hnu lamah hun rei tak a tha lo lamin min nghawng thei tih a sawi a. Mithiamte sawi kher ngai lovin heng thil tangkai lo halna atanga chemical chambang ten boruak a ti bawlhhlawh a /air pollution a siam tih a chiang em em a . Chuap lama harsatna nei leh allergy nei nasa te tan a khu hip te, nerve leh taksa chak lo leh lung tha lo tan a ri avanga phut zawk zawkna te hian harsatna khirh zawk a thlen thei a ni a ti.

Home Minister chuan CYMA ten kan zavaia thatna tur te leh kan hunpui te chhungtin ten ralmuang taka kan hman theihna tura inzirtirna an kalpui chu lawmawm a tih thu a sawi a. “Kumin chauh ni lovin, kum dangah pawh hetiang hian mipuite ngenin kan lo kalpui tawh thin a. Krismas bawrah hi chuan a reh fu a, Kumhlui thlah zanah hian kan insum zo lo thin a. Branch YMA hruaitu hrang hrang rawn kal khawm te u, a hmaa ka han sawi tak te ang khian in veng theuhah theihtawp lo chhuah a, tan la leh turin ka ngenin ka sawm che u a ni”, tiin YMA hotute a ngen nghal bawk a ni. Nikum lama halpuah leh halmawi te, Sky lantern te hal lo veng an awm nual thu sawiin an thiltih entawn tlak tak avangin an chungah lawmthu a sawi a. Heng veng entawntlakte chawimawia atan hian kuminah pawh Discretionary Fund atangin lawman siam leh a ni a ti.

CYMA buatsaih Halpuah, Halmawi, Silai lem, Sky Lantern,etc., khap chungchanga inzirtirna hi Pu Vanlalruata, President, CYMA chuan a kaihruai a. Prof Lalnuntluanga, General Secretary, CYMA in Report a pe a. Hemi hnuah hian YMA hotute pual inzirtir chu a buatsaihtu Tv Lalhmachhuana, Vice President, CYMA chuan sawina hun a hmang a. He hunah hian halpuah/halmawi in mihring hriselna a nghawng dan te, kan chhehvel boruak bakah min hualveltu (Environment) a tihchhiat dan te, sum leh pai a nghawng dan te, a khapna leh hremna chungchang bakah he thil thalo laka khawtlang a himna tura YMA mawhphurhna te chipchiar taka inzirtir a ni.

Attachment

  • Loading attachment...