No.2721/2021-2022
Aizawl 26.10.2021: Chief Minister Pu Zoramthanga chuan vawiin khan Thuampui branch YMA Library building a hawng.

Chief Minister chuan library chu thiamna petu pawimawh tak, a hmang tangkai thiam apiangte tana hlu zual zel a nih thu a sawi a. Tunlai khawvelah electronic media hmang nasa hle tawh mah ila physical library chu a hlutna a bo chuanglo a ni, tiin lehkhabu finna belhchhah thei chi chhiar intihhmuh belh zel tha a tih thu a sawi a. Thuampui YMA Branch ten Library building changtlung tak an din chu fakawm a tih thu a sawi bawk.

Chief Minister chuan COVID-19 hrileng avanga hmasawnna hna tam tak a thuanawp thu sawi telin, Mizoram chauh nilo, ram pum chauh pawh nilo, khawvel pumah nghawng nasa tak he hri hian a nei a ni,a ti a. Chumi karah chuan a thalo lam chuah thlir lovin, Pathian remtihna avanga he hri hi leng a nih angin, enge min hriattir a tum a, enge zirchhuah tur kan neih tih zawngin ngaihtuah a inbuatsaih pawimawh tha a tih thu a sawi.

Vawiin library building hawnna pual inkhawmah hian AMC Ward-VII Councillor Pu Vanlalneiha pawh telin bial chhung mipui tana tangkai tak tur library leh thil dangah hman tel theih tur building siam a ni chu lawmawm tiin, YMA mai bakah tlawmngai pawl dangte leh khawtlang hruaitute nen thawhhona tha tak a tilang a ni, a ti a. Chief Minister hmalakpuina chungah lawmthu a sawi bawk.

Library building hi kum 2017 July thla khan sak bul tan a ni. A dung 36 ft leh a vang 34 ft niin chhawng thum a awm a. Nimin October ni 25 khan peihfel a ni. Building sak nan hian bialtu MLA, Chief Minister Pu Zoramthanga hnen atangin MLA Fund Rs 5,00,000/- dawn a nih thu leh, a sak nan hian hnatlang tha tam tak chhawr telin, a theih dan apianga sum zawn belh pah chunga sak a nih thu vawiina inkhawm kaihruaitu Er. K. Lalrinmawia, YMA Thuampui Branch President chuan a report a ni.