Home Minister Pu R.Lalzirliana chuan nimin khan zan hnih cham turin Ngopa a thleng a; Ngopa a thlen hian Ngopa mipui leh khawtlang aiawhtu ten ropui takin an lo hmuak a , amah lawmna pualin vantlang inkhawm tawi neih a ni bawk. Hemi zawh hian Home Minister chuan Ngopa Sports Complex leh Ngopa R D Block Office Complex te chu a tlawh leh nghal a ni.

Inkhawm tawi neih a thusawiin Pu R Lalzirliana chuan Mizoram Police te chu inthlahdah lova, dan leh thupek kenkawh lama an thawh that avangin hel pawl te Mizoram atangin nasa takin an in thiarchhuak a ni, a ti. Home Minister chuan NLUP tanpuina thawh hnihna (2nd Phase) dawng turte chu October thla tawp lamah thlan an nih tur thu sawiin Thawh khatna (1st Phase) a NLUP tanpuina sum lo dawng tawh te chu dik taka hmang a, mahni tu leh fate tan ro tling (assets) siam turin a chah a, a dawngtute chu theitawp chhuah a, hlawlh tling ngei turin a fuih bawk a ni.

Home Minister chuan Sorkar chu mipui tan malsawmna ni tura thawk a ni tiin mi harsa leh mirethei Rangva inchung nei zo lote tan a thlawna Rangva sem chu kalpui chhunzawm leh a ni, a ti a. Kumin chunga a thlawnna Rangva Semna tur atan tender cheng nuai 400 hu man koh mek a nih thu a sawi.

Rural Development Department kaltlanga Ngopa Sports Complex sak mek chu Home Minister chuan a tlawh a. Ngopa RD Block Office Complex a tlawhna a Pu R. Lalzirliana chuan BDO office a hnathawk tute chu mipui tan thawk an ni tih hre reng chunga, lungrual taka an mahni hna theuh rinawm taka thawk turin a chah a ni.