Home Minister Pu R. Lalzirliana leh Environment & Forest Minister leh bialtu MLA ni bawk Pu H.Rohluna te chuan nimin zing khan NE Khawdungsei an tlawh.

Anmahni lawmna vantlang inkhawm ah thu sawiin Home Minister chuan Rural Development Department hmalakna avangin BADP, IWMP, MGNREGS hmangin Zokhaw lamah hmasawnna hna tam tak thawh a ni, a ti a. Heng Project leh Project thar awm tur – Rural Livelihood Project ah te hian thawktu lak turte chu mithiam leh mi tha lak a pawimawh leh a tul thu Minister chuan a sawi.

NLUP tanpuina sum chu inthliarna awm lovin sem a ni a tiin Pu R.Lalzirliana chuan NLUP hlawhtlinna chu a dawngtute ko ah a innghah thu a sawi a. NLUP chu mi rilru nei tan chuan dinchhuah puina tham a nih thu sawiin Home Minister chuan a dawngtu te chu tih tak zeta rinawmna leh taimakna nen hna thawk turin a chah.

He hunah thu sawitu dang Pu H.Rohluna chuan Ngopa tlangdung chu Manipur leh Burma ramri te a hnaih avangin heng ram atanga hel lo lut ru thin chuan mipui a tih thlaphang thin thu sawiin Sorkar in IR Outpost, NE Khawdungsei a a dah chuan mipui te an thlamuan a ni, a ti. NLUP chhungchang sawiin Minister chuan a ti tha lo te chu tanpuina sum Installment dang chu pek a nih loh tur thu a sawi.

Home Minister leh Forest Minister chuan NE Khawdungsei daia IR Outpost chu an tlawh a, Sipai barrack leh Outpost hmun hma te an en a. Home Minister hian Outpost Choka inchung atan Rangva ban 4 a pe bawk a ni. Hemi hnu hian Home Minister chuan ni za inhlawh kaltanga NE Khawdungsei mipui ten RCC Tanky an siam chu a tlawh bawk.

Home Minister leh Forest Minister te chuan nimin vek khan tun hnaia Ngopa khawchhunga leiminna hmun an tlawh a, a tuartu chhungkua te an hmu bawk a ni.