Science and Technology Department buatsaihin vawiin khan Mizorama boruak inthlak danglam nasa lutuk chungchang zirhona leh a tiziaawm tura hmasawnna hnathawh dan tur ruahmanna, cheng vaibelchhe 2800 senga buatsaih tur thlirna leh inrawnkhawmna chu Aijal Club, City Centre, Aizawlah neih a ni a. Planning Board Vice Chairman Pu Lalkhama IAS (Rtd) chuan he Workshop hi a hawng.
Pu Lalkhama chuan khawvel hmasawnna chak tak hian sik leh sa a nghawng a, mihring mai nilovin thil nung zawng zawngin chu chu an tuar mek a ni, a ti. Kan chenna hualvel tu environment leh nunna hi then hran theih lohvin a inzawm a, science leh thiamna hrang hranga hmasawnna chak taka khawvelin a tawn chhoh mek hi environment humhim zawnga kan kalpui a tul takzet a ni, a ti a. Sik leh sa inthlak avangin ramngaw in a tuar a, thlai leh ran ten an tuar bawk a, hetiang zela kan kal chuan khawvel hi chenna tlak lovah kan chan thuai dawn a ni tiin Planning Board Vice Chairman chuan tun atanga harh chhuak a, hmasawnna tura ke kan pen meknaah boruak inthlak (climate change) ti ziaawm tura ngaihtuahna seng turin kalkhawm te a sawm a ni.
He workshop hawnna inkhawm kaihruaitu Dr. Vanlalzara, Principal Scientific Officer, Directorate of Science and Technology leh Member Secretary, Climate Change ni bawk chuan Germany a pawl pakhat GIZ leh CTRAN (Constant Transformation), India tangkawpin boruak inthlak mek (Climate Change) ti zia awm zawnga hmasawnna hna kalpuina atan cheng vaibelchhe 2800 lai senna tur ruahmanna an siam thu a tarlang a. Hmasawnna tluantling a awm theih nan kalkhawmte chu an finna leh remhriatna thawhchhuahpui turin a sawm a ni.
Hawnna inkhawm zawh hian technical session neih chhunzawm nghal a ni a. Ni zung leh thli chakna hman tangkai dan tur te, Agriculture leh a kaihhnawih danga hmalak dan tur te, ramngaw siam leh humhalh dan tur te, hriselna tha zawk neih dan tur leh tui hman dan tur te, chenna hmun thaa chen dan tur te sawiho a ni. Technical Session hi tum thuma then niin Agriculture Secretary Pu T.V. Fambawl, Er. Dunglena leh SIPMIU Project Director Er. Valbuanga ten an kaihruai a ni.
Mizoram Climate Change Action Plan Stakeholder Consultation Workshop-ah hian Mizoram Climate Change-a member te, CTRAN mithiam te, sawm bik mithiam te bakah sorkar mi pawimawh engemawzat an tel a ni
