NEC Division, PWD, Champhai leh Quality Control Division, PWD tangkawp buatsaih PMGSY hna chungchanga training, nihnih awh chu Superintending Engineer, PWD, Eastern Circle hnuaia Division 4 - Champhai, Khawzawl, Saitual leh Serchhip hnuaia Engineer te pualin I&PR Auditorium, CHANEM Building-ah tukin zing dar 10:00 atang khan neih a ni a. Er. Lalrinngheta, EE, Quality Control kaihhruaiah hian Er. K.Lalsawmvela, CE (Planning) chuan training-a telte fuihna thu leh training hawnna thu a sawi a ni.

Er. K.Lalsawmvela chuan PMGSY hi India ram pum huapa hmalakna niin, 1999 khan Sorkar Laipui chuan he hmalakna kalpui tur hi duang felin December ni 25, 2000 khan khatih hunlaia Prime Minister A.B.Vajpayee chuan India ram puma kalpui turin he scheme thar hi a hawng a. PMGSY hi India ram puma thingtlang inkalpawhna tur atana hmalakna niin, inkalpawhna kawng siam chu sorkar laipui ngaih pawimawh a nih avangin he scheme hi kalpui a ni ta a ni, a ti a. India ramah hian 74% chu thingtlang mite an ni a, chung zinga 40% chuan PMGSY kalpui tan hma hian kawng tha an nei lova. PMGSY hmang hian thingtlang inkalpawhna kawng siamna tur scheme hi kalpui niin, he scheme atan hian sorkar Laipui chuan India rama Diesel hralhchhuah litre 1 zelah Re. 0.50 (Duli) lak nise, tiin thutlukna an siam a. Mahse sum mamawhna a lo san em avangin hemi hnu hian Re. 1 lak a ni ta a ni, a ti. Kawng sial tharna atan hian a tirah Rs. Vaibelchhe 7900 leh kawng awmsa chei thatna atan Rs. Vaibelchhe 53,000 dah tura ruahman a ni a. Mahse PMGSY hi India ram pum huap a nih avang hian beisei angin a kal chak thei lo tih a sawi a. Kan hna kan thawh that loh avang leh kan inthlahdah avangin a kal muan lehzual theih avang erawh chuan theihtawp kan chhuah tlan a tul a ni, a ti.

Mizorama PWD lo indinchhoh dan chungchang sawiin, British hunlai khan Mr. Green (Sapsakeia) enkawlna hnuaiah awmin, British in India a awp chhung khan Mizoramah motor kawng Mel 104 leh thingtlang inkalpawhna kawng feet 6 vela zau Mel 654 min hnutchhiah a; khatih hunlai khan Mizoramah motor  20 vel a awm tawh tih a tarlang a. Sapsakeia hi a lar hle a, Mizoram hmun hrang hrangah Sapsakei lamlian pawh a awm nual reng a ni, a ti. India in Independence a hmuh a, a indan hnuah Assam hnuaiah kan awm a, Assam hnuaia kan awm chhung leh UT kan nih hma khan Black-top Km 760 leh Earth Road Km 780 vel thawh a ni a. Hemi bak hi chu  UT kan nih hnua thawh chhoh a ni, a ti. Kum 1975-ah Mizoram chuan Principal Engineer kan neih thin chu Chief Engineer-ah thlak niin; PWD, PHE leh P&E Deptt. chu dahkhawp vek thin a ni a. 1979 ah P&E Deptt. chu PWD atang hian a indang a; 1985 ah PHE Deptt. chu a indang zui veleh a ni, a ti.

A sawi zelahnaah Er. K.Lalsawmvela chuan April, 2000 ah Border Roads  Organization (BRO) chuan National Highway chu PWD kuta a hlan chauh avangin leh sum leh pai lama harsatna awm zui bawk avangin kan kawngpuite a tha tawk lo tih kan hria a. BRO te hian kan kuta kawngpui enkawlna hna hi an hlan dawn tih an lo hriat lawk tawh avangin hun rei tak chhung enkawl mumal lovin an awm a, hei hi kan  kawngpui chhiat chhan pakhat a ni bawk tih a tarlang a. BRO te hi ramri-a kawngpui siam leh enkawl tura Sorkar Laipuiin a tih vanga kan kuta hlan an ni a, hei Mizoram sorkar ngenna avanga hlan an ni lo tih a tarlang bawk.

Training neih tan takah hian Er. Lalrinngheta, EE, Quality Control Division, Er. Lalengzauva, Er. Lalhmasaa, Er. Samuel Ramdinthara, Er. Malsawmdawngliana leh Er   Lalduhzuala Sailo ten PMSY hnathawhna kawnga pawimawh hrang hrang chungchang chu Engineer te hnenah hian training hi an pe a. He training-ah hian Engineer  5o chuang an tel thei a ni.