Pu Lal Thanhawla Chief Minister, Mizoram chuan nimin 19th October, 2011 chawhnu dar 4:00 khan I&PR Conference Hall, Mamit-ah Mamit a Department hotute hmaah thusawiin sawrkar hnathawkte hi a nghet a ram tana thawktute an nih avangin Neitu Rilru pu-a hna thawk turin a chah a. Sawrkar hnathawkte vanneihzia tarlangin hei hi mahni tan chauh nilo, keini aia hnuaihnung zawk te tan pawh a malsawmna kan nih theihna turin kan thawh a tul a ni a ti. Chief Minister chuan sawrkar hnathawkte hi sawrkar apiangah rinawm tak leh nghet taka thawk mai tur kan nih thu sawiin mi thenkhat an rin Party an lo sawrkar a awm chin tawk hre lo an awm thin hi a pawi a; sawrkar hnathawkte awm dan tur a ni lo a ni a ti bawk. Sawrkar hnathawkte hi kan hnaah kan tuiin kan thiam nal tur a ni tiin, Discipline chungchangah te, hun vawn dikah te leh office leh a vel vawnfaiah te nasa taka tan la turin a chah a. Smoke Free Mizoram puan anih tawh angin sorkar hnathawkte zuk leh hmuamah kan fihlim tur a ni a ti bawk.

Chief Minister chuan sorkar hmalakna hrang hrang sawilangin NLUP sawrkar-in a kalpui mek pawh uluk leh flmkhur taka kalpui niin heti chung pawh a 2nd Instalment pek tlak loh mi engemaw zat an awm hi a pawi a, helama mawhphurtu Department te pawhin thahnemngai taka in thawh a tul a ni tiin tun tumah hi chuan NLUP hi kan hlawhtlin pui ngei kan beisei a ni a ti.

Corruption chungchang sawiin Corruption tireh turin nasa takin sawrkar chuan hma a la a, hemi a lo hlawhtlin theih nan hian sawrkar chauh ni lovin sawrkar hnathawkte nen kan tan tlan a tul a ni tiin sawrkar hnathawkte chu kut tling lova sum laknaah kan fihlim ngei tur a ni a ti bawk.

Langtlang sawrkar siam tura RTI Act hman tangkai a tul thu sawiin hemi chungchangah mipui tana RTI awlsam zawka buatsaih turin Chief Information Commission a sawipui tawh thu a sawi a. Chubakah dik lo taka chhangtu sorkar Officer te pawh hrem an nih zel tur thu a sawi bawk.

Chief Minister chuan sawrkar in sum lama harsatna a tawh mek chungchang sawifiahin heti chung hian sawrkar chuan theihtawpin hma a la mek a, hetih lai hian sawrkar hnathawkte pawh dik tak a hna thawk turin a chah a ni.

Pu Lal Thanhawla Chief Minister hi a nupui Pi Lal Riliani, Pu John Rotluangliana, Deputy Speaker,  Pu Lalrinmawia Ralte, Parliamentary Secretary, Home, etc. leh Pu V.L. Robiaka ML A, Chairman, ZIDCO ten an tawiawm a ni.

He inkhawm hi Pu A. Biaklawma Additional DC, Mamit in kaihruaiin Mamit a Heads of Offices te an tel tha hle a ni.