Vawiin khan District Election Officer leh Electoral Registration Officer-te tana buatsaih ni 1 awh ‘Training on Public Grievances Redressal System leh EVM Tracking System’ chu NIC Training Hall-ah neih a ni a. Training hawnna hi Lunglei  D.C. Pu V.Sapchhunga, Jt.CEO Pu H.Lalengmawia leh Asst. CEO Pu R.Lalsawta ten an hmanpui a ni.  
 
Training huahawt a nih chhan sawiin Pu H. Lalengmawia chuan India Danpuiin mipuite dikna chanvo a pek angin mitin ten kalphung fel tak neia Election chungchang leh a kaihhnawih thil chi hrang hrangah zawhna emaw thurawn emaw lungawi lohna emaw te reng reng awlsam taka thuneitute hnenah an thlen zung zung theihna turin Election Commission of India chuan tunlai thiamna thil thar a duang chhuak a. He Public Grievances Redressal System leh EVM Tracking System / Call Centre hi internet hmanga District hrang hrang, State Headquarter leh Election Commission of India te nena in thlun zawm vek a ni nghe nghe a ni, a ti. EVM te hi vote thlakna atana hman thin khawl pawimawh tak a ni a. EVM tinte hian chhinchhiahna number bik an nei theuh a, heng EVM-te hi khawi hmunah pawh dahsawn mahse awlsam taka chhui chhuahna tur computer software siam a ni. Chuvangin heng thil pahnihte hi computer thiamna hmanga awlsam taka DEO leh ERO ten hna an thawh theihna tura he training hi buatsaih a ni, a ti bawk.

He Public Grievances Redressal System leh EVM Tracking System, Call Centre tia koh mai hi District tinah dah a ni a, biak pawh theihna number chu ‘1950’ a ni a. State chhung bakah rampuma election office zawng zawng leh Election Commission of India te nen inthlunzawm vek niin thu lut leh chhuak reng reng te chu langtlang taka sorkar leh mipui inkarah a awm theih nana ruahman a ni.