Aizawl-a school hlun leh hriat hlawh tak, Republic Higher Secondary School kum 50 tlinna Golden Jubillee chu vawiin khan ropui taka lawm a ni a. He school a zirtirtua hun engemaw chen lo thawk tawh Pu C.L.Ruala M.P (Lok Sabha) chuan Khuallian niin Jubillee lawmna hi a hmanpui.

Republic HSS jubillee lawmna inkhawm hi school khelmualah neih niin Principal Pi Rosangliani’n inkhawm a kaihruai a. Khuallian Pu C.L.Ruala chuan thu sawiin Republic HSS chu Mizote zirna kalkawnga sul sutu, ram tana mi chhawr tlak thahnem tak lo chher chhuaktu a ni, a ti a. Zirtirtu ten theihtawp chhuaha an naupangte nakina mi hmantlak ni tura an buatsaihna chu ti hlawhtling tura zirlaite chu fuihin an zin kawng hi vawi khat chauh an zawh dawn a ni tih hre reng turin a chah.

Jubillee lawmna ah hian Republic HSS a lo kal thin leh lo thawk tawh thahnem tak bakah school danga zirtirtu te an tel a. Pi Lalhmaingaihi Ralte, Headmistress chuan school chanchin tlangpui report pe in Rev. R.Vanlalruata, Ex-student in hunserh a hmang a ni.

Republic HSS hi kum 1961 January 26 khan High School a din a ni a. Kum 1965 ah HSLC Batch hmasa ber an chhuak a. Kum 1972 ah Deficit a hlan niin 1991 khan sorkar in a la ta a. Tunah hian stream hrang hrang, Arts, Science, Computer Software zirna te neiin kumin hian zirlai 647 leh thawktu 55 an awm a ni.