Vawiin khan Home Minister Pu R Lalzirliana chuan a Pisa-ah Press Conference a nei a, HPC (D) self styled Army Chief Lalropuia leh self styled Deputy Army Chief Biaknunga man chungchangah a hnuai ami ang Press Statement a siam.
June ni 10, 2012 (Pathianni) zing dar 9:00 khan Mizoram Police ten HPC (D) S/S Army Chief Lalropuia leh S/S Dy Army Chief Biaknunga Silchar-ah an man a. HPC (D) te hi Manipur State-ah Central sorkar hriatpuina in Suspension of Operation Agreement (SoO) nei lai an ni a, SoO Agreement hi 22nd August, 2008 atanga hman tan a ni tawh a. SoO Agreement chhungah hian points tam tak tih tur leh tih loh tur ziah lan niin heng a hnuaia points te hi chung zinga points thenkhatte chu an ni :-
1) HPC (D) Cadres zawng zawng te designated Camp-ah sorkar hriatpuina in an awm tur a ni.
2) An ralthuam zawng zawng a bo a bang awm lovin Security force te hriatpuina in hmun khatah an dah khawm ang a, ralthuam dang an leiin emaw an chaw lut tur a ni lo.
3) Cadre thar an lak belh tur a nilova, hel dang tumah training an pe tur a ni hek lo.
4) Midang bungrua tichhe zawngin emaw, midang nunna tiralti zawng emaw, Security force te lakah emaw operation eng chi mah an ti tur a ni lo.
5) State sorkar function pawimawh leh development tibuai zawngin tha engmah an thawh tur a ni lo.
A chunga points kan sawi hrang hrang Agreement te hi anmahni ngeiin pawm thlap chunga an sign hnan hnuah Mizoram chhung leh pawnah HPC(D) te hian mipui tithlabar zawng leh Mizoram State ralmuang tak chu tibuaiin SoO Agreement points te hre reng chunga palzut luiin heng a hnuaia points thenkhat kan tarlante hi an ti chhunzawm reng a ni : -
1) Ni 2.9.2008 khan (SoO Agreement an sign hnu lawkah )1st IR Bn. Pay Escort Party chu lo lambunin, mi pali (4) an that a, mi pathum (3) na takin an hliam.
2) Ni 22.1.2010 khan khatih laia SHDC hruaitute leh SHDC hnuaia contractor thenkhatte Hmarkhawlian-ah ko thla luiin Demand Area chhunga khawtin VC ten Job Card lem zahnih (200) aia tlem lo theuh siamtir turin a hrilh a, Demand Area chhunga contractor reng rengin estimated amount atangin 10 % deduct a, HPC (D) hnena pe turin an lo hriattir bawk.
3) Ni 15.2.2012 khan HPC(D) te hian SHDC area huam chhunga political leaders te Tuiruang kamah ko luiin, ni 23.2.2012-a Mizoram State VC election lo awm turah HPC Party candidate te chauh thlang tling turin an lo vau a. He invauna hi Demand Area chhunga VC election a in candidate tum ten an hlauhthawn em avang leh State Election Commission pawhin ‘free and fair election’ awm thei dawn a a hriat loh avangin khaw sawmpanga (15) zetah inthlan hi buatsaih theih a ni ta lo a ni.
4) HPC (D) te hian SoO Agreement anga an ralthuamte Security force te venhimna hnuaiah dah lut vek tura ngaih an nih laiin hmun hrang hrangah an thukru thin tih chiang taka hriat a ni. Ni 13.3.2012 khan Kangrengdawr khaw bul lawkah an silai tha tak tak, AK-47 pathum (3 nos), H&K (Heckler & Koch) pahnih (2 nos), DBBL gun sawmparuak (16 nos) leh a mu 500 (zanga) bakah grenade sawm (10 nos) lai chu ramhnuaia an thuhrukna bul civil mite lo halah a kang chhe vek a. Heng silai kan thu sawi chhuaktu civil mi pawisawi lo te hi bawng leh vawk te chawi tirin nasa taka vauin ngaihdam an dil luih tir bawk.
5) Ni 17.4.2012 atang khan an Demand Area huam chhunga VC, sorkar hnathawk leh chhungkaw tin hnen atangin tukluihna pawisa, VC lian deuh atangin Rs. 30,000/-, VC te deuh atangin Rs. 10,000/-, sorkar hnathawk chhungkua atangin Rs. 500/- leh sorkar hnathawk lo chhungkua atangin Rs. 300/- theuh pe turin lehkha leh mobile phone hmangin an ti a. Khaw sawmhnihpariat (28) zet chu he lehkha leh vauna avang hian thinthi in an mut ngam loh phah a ni.
6) Tun hnaiah HPC(D) te chuan Demand Area huam chhunga YMA Branch awmte thiat vek turin thupek an pe a, Mizoram a tlawmngai pawl lian ber, Zohnahthlak hrang hrang te lungrual taka hmun pakhata phuarkhawmtu YMA an bitum ta mai hian Zohnahthlak inpumkhatna a chhe zawnga nasa taka a nghawng theih avangin sorkarin a la thu tak hle a ni. Hriat theih chinah Demand Area chhung atanga YMA Branch sawmthum pasarih (37) zet te chuan YMA branch ding ngam lovin an seal te Group YMA leh CYMA-ah an submit tawh nghe nghe a, heng branch sawmthum pasarih(37) te bakah hian branch dang pakua (9) te pawhin branch thiat tura vuana an dawng bawk a ni.
7) HPC (D) te hian a rukin Cadre recruitment an kalpui reng bawk a, chu bakah, Mizoram chhunga company hrang hrang hnathawkte hnen atangin vawi duai lo pawisa dilin an vau thin a ni.
Heng a chunga kan sawi points hrang hrang HPC(D) activities te avang hian Mizoram State ralmuanna vawn nun zel nan te, Zohnahthlak te inpumkhatna kenkawh anih zel nan leh Mizoram khawi hmunah pawh mitin in zalen taka kan awm chhunzawm zel theih nan te, a tibuaitu leh kawhmawhbawl ching ten kawng dik lo an zawh chhunzawm zel loh nan heng HPC (D) hruaitute hi man an lo tul ta a ni.
