1067/2025-2026

Dated Aizawl, the 4th July, 2025: Vawiin chawhnu khan Mizoram Home Guards & Civil Defence (MRHG&CD) review meeting chu MRHG&CD Conference Hall, Chawlhhmunah neih a ni a. He hun hi Home Minister Pu K. Sapdanga chuan khuallian niin a hmanpui.

Minister Pu K. Sapdanga chuan Mizoram Home Guard leh Civil Defence-a volunteer-te chu ram leh mipui tana hna pawimawh tak tak thawktu an nih thu sawiin, sawrkar hmun pawimawh vengtu, khuarel chhiat nikhuaa chhanchhuah leh chhawmdawl hna thawktu an nih bakah law & order kenkawh kawnga police tanpuitu an nih thu a sawi a. MRHG&CD dinhmun chawisan a nih theih nan leh politics inrawlh lova (political appointment) hna lak a nih theih nan hna lak dan (recruitment system) felfai zawk siam a tul thu sawiin, volunteer hna dilte tan hna dilna standard form siama open advertisement tih chhuah ni se, educational qualification pawh tihsan ni thei se a duh thu a sawi bawk. 

Home Minister chuan MRHG&CD volunteer-te retirement benefit nei lova an awm reng chu veiawm a tih thu sawiin, Mizoram Provisional Employee Savings Scheme 2024-ah an tel theih dan tur ngaihtuah a tul thu a sawi a. MRHG&CD-a volunteer-te chu ral do tura ngaih ni lo mah se ralthuam pek an nih thu leh a tul chuan ral do tura inring tur an nih thu sawiin,  mi tha leh rintlak ngeite laka tuai hriam leh training tha tak pek an ngaih thu a sawi a ni. 

Home Secretary Pu Vanlalmawia pawhin thu sawiin, civil defence inralrinna (preparedness) tih that a ngaih thute, MRHG&CD hna chanpual (role) tih chian lehzual a tul thute a sawi a. Khawvel hmasawn leh changkang chho zel mila uniformed service-te pawhin tunlai thiamna hman tangkai dan an zir thar ve zel a pawimawh thu a sawi bawk. 

Vawiin thutkhawmah hian Major Zosangliana Hualngo, Commandant General cum Director, MRHG&CD chuan presentation pein thupui chi hrang hrang- MRHG&CD inrelbawlna leh thawktute service chungchangte, CTI Sesawnga Training Centre tih changtlun dan turte leh hmachhawp dangte sawi ho a ni a. Dr. Andrew H. Vanlaldika, Additional Secretary, Home Department chuan lawmthu sawiin hun a khar a ni.