2805/2026-2027

Aizawl, 24th October, 2026: Vawiin chawhnu khan Home Minister Pu K. Sapdanga chuan Assam Rifles (AR) in an chhuahsan tak ram, Aizawl khawpuia laili a awm chu hmang tangkai tura sorkar hmalakna kalpui mekte a hmunah tlawhin a endik. He hunah hian Land Revenue leh I&PR Minister Pu B. Lalchhanzova bakah PWD, PHE leh UD&PA hotute leh Aizawl Mayor in an  an tawiawm a ni.

Hna thawh dan enfiahtu Home Minister chuan, AR chhuahsan ram hman tangkai dan turah ruahmanna (master plan) fel tak siam lawk vek a nih thu a sawi a. "Hnathawktuten kan mitthlaa kan hmuh dan aiin hna an lo thawk nasa a, a lawmawm hle a ni," a ti. Khaw chhiat  avangin duh angin hna a kal chak theih loh thu sawiin, ruah a ban deuh tawh avangin October thla atang chuan hei aia chak zawka hna thawh theih beisei a nih thu a sawi.

Lammual hnuaia Bypass road siam mek chungchang sawiin, kawng laih hna chu thahnem tak an thawk tawh tih a sawi a. He hmunah hian mipuite tana tangkai tur hmunhma hrang hrang awm dawnin,   thing uihawm tak takte chu a theih chen chenah zuah hram tum a nih thu a sawi a; amaherawhchu, mipuiten an mamawh em em kawngpui erawh siam ngei a ngai tih a sawi bawk. "Treasury Square leh Bazar Bungkawn inkarah motor riah phal a ni tawh dawn lo va, mipuite tana hman tur parking lian tak tak  siam a ni ang," a ti. Sipai in hlui, Quarter Guard building erawh chu thiah lova humhalh  a nih tur thu a sawi bawk.

Vawiin huna PWD leh PHE hotute atanga thu dawn angin  ruahmanna kal mekah he hmunah hian Heritage Court leh Exhibition neihna tur hmunte siam a ni dawn a. Building awm sate chu thawm that tur niin sak belh ngai te pawh sak a ni bawk ang.Lammual hnuaia Bypass road siam thar hian Post Office bulah lut tanin, Saron Veng BCM Biakin bulah a chhuak dawn a ni. He kawng siam hna hi za a 17 chu thawh zawh tawh a ni. kawngpui zauh hna kalpui mek pawh chhunzawm zel a ni a, hei pawh hi zawh fel thuai beisei a ni bawk.

Home Minister chuan sorkar hmalakna leh hnathawktute sulhnu chu hmuh a nuamin a hlimawm hle tih a sawi a. Hnathawh kalphungte thlithlaiin a khat tawka tlawh zeuh zeuh a tum thu a sawi bawk a ni.