980/2026-2027

Dated Serkhan, the 12th June, 2026: Vawiin khan Mizoram Home Department changtu Minister Pu K. Sapdanga chuan Serkhan khawtlang leh a chhehvel tana hmasawnna pawimawh tak tur Serkhan Police Outpost chu khuallian niin a hawng.

Home Minister Pu K. Sapdanga chuan Serkhan Police Outpost-a hawnnaah hian khawtlang ralmuanna leh mipuite himna tura hmalakna pawimawh tak a nih tur thu a sawi a. Thawktu indaih lohna nasa tak karah Serkhan Police Outpost hawn theiha buatsaih a nih thu a sawi. Kum 2025 kha Mizoram Police 'Fitness' a hmasawnna beihpui thlak kum kalpui a nih hnuah kumin kum 2026 hi 'Discipline' tha kenkawh kum atan kan hmang mek a, hmasawnna awm tur chuan inhriatthiamna kan paih bo hret hret a tul a ni, a ti. Police hna kalpui danah Home Minister chuan dik tak leh langtlang taka kalpui a nih thu tarlangin, hriselna ngaih pawimawh zual zel a nih tur thu a sawi.

Pu K. Sapdanga chuan Police Outpost chu dan leh thupek kengkawhtu, Police te leh khawtlang mipuite indawrtawnna hmun pawimawh tak a nih thu a sawi a. Thawktute pawh mipui thlamuan thei turin hawihhawm tak leh inpekna thuk tak nen he Outpost hi enkawl turin a fuih bawk a ni.

Home Minister chuan tlawmngai pawl leh Police te thawh hona tha tak avangin Mizoram hmun hrang hrangah hlawhtling takin ruihhlo do kalpui thin a nih thu leh dan lova kuhva ro tawlh rukna do kawngahte hma lak a nih thu a sawi a. Heng hmalakna tichak lehzual tur hian Serkhan Police Outpost hi hmanraw tangkai tak a nih a beisei thu a sawi bawk a ni.

Pu H. Ramthlengliana, IGP chuan Serkhawn Outpost chungchang report pein, kum 2020 December khan Outpost din dilna hi thehluh a nih thu a sawi a. January ni 14, 2021 khan SP Kolasib chuan zirchianna uluk taka a neih hnuin, Serkhan Police Outpost din a tul zia leh a tangkai dan tur hrang hrang ziakin a thehlut leh a. A tul ang angte bawhzui zel niin a hmun tur ramte en fel a nih hnu ah, February 2026 khan Mizoram Sawrkar chuan Serkhan Police Outpost dinna tur Notification a tichhuak ta a ni. tun dinhmunah Serkhan Police Outpost-ah hian thawktu mi 5 an awm dawn a, chhungte chu Sub Inspector 1, Head constable 2, Constable 1 leh driver 1 an ni a. Khua 6, Serkhan, Lungdai, Lungmuat, Nisapui, Bukpui leh N.Chaltlang a tuam dawn a ni.

He hunah hian DIG (NR) Pu C. Lalzahngoa chuan kalkhawmte lawmna thu a sawi a, Pu Lalrinpuia Varte, SP, Kolasib chuan lawmthu sawina hun a hmang bawk a ni.

Serkhan Police Outpost hawnna hun a hman zawwh hian Home Minister Pu K. Sapdanga chuan Mualkhang Gas Bottling Plant-a tlawh a. Eirawngbawlna gas hnianghnar zawk neihna tura Mualkhang Gas Bottling Plant tihchangtlun mek a ni chu lawmawm a tih thu a sawi a. Gas cylinder buk tling lo awm thin tih bo nana hmanraw tangkai a nih a beisei thu a sawi bawk a ni.

Mualkhang Gas Bottling Plant tlawhna ah hian Pu B. Lalchhanzova, Minister, Food, Civil Supplies & Consumer Affairs chuan Aizawl khawpui leh Mamit chawm thei tur Piped Natural Gas kalpui turin ruahmanna a awm mek thu a sawi a. Ruahmanna tluang taka kalpui a nih chuan kum 2027 hian Sihhmui a thlen theih beisei a nih thu a tarlang bawk a ni. Supply Minister chuan, Mualkhang Gas Bottling Plant tihchangtlun hna thawh zawh a nih chuan, nitin gas cylinder 7500 bawr vel rawn thleng ziah tawh tura beisei a nih thu sawiin, hei hian eirawngbawlna Gas hnianghnar zawk mipuiin kan neih theihna tura hmalakna a nih thu a sawi.

Pu Z Lhungdim, Dy General Manager IOCL tarlan danin Boundary hung leh retaining Wall siam hna chu za zela 90 vel thawh zawh tawh a nih bakah Land Development hna pawh za zela 75 bawr zel thawh zawh a nih thu a sawi a. Heng hnate hi July ni 21, 2026 hian thawh zawh hman beisei a nih thu a sawi. Heng hna thawh zawh a nih hnu hian Mounted Storage Vessel bun hna thawh tan tur a ni dawn a, ruahman dan chuan 900 MT dawl zo tur leh nitin LPG cylinder 7500 bawr vel a dawng zo dawn a ni. Kang mei chhuak palh a lang thelhna tur tui 6000 KL dawng thei tur tanky sak a ni dawn bawk a, thawktu, Contract Staff mi 50 bawr vel mamawh a nih tur thu a sawi bawk a ni.

Vawiin hian Home Minister hi Deputy Speaker Pu Lalfamkima, FCS&CA Minister Pu B. Lalchhanzova, Adviser to CM Pu Lalmuanpuia Punte, MLA Lt. Col. Clement Lalhmingthanga, MLA Pu T. Lalhlimpuia, MLA Pu K. Laldawngliana, MLA Pu Jeje Lalpekhlua, DGP Pu Sharad Agarwal, Addl. DGP Pi Meenu Choudhary te bakah Home Department Joint Secretary Pu PC Lalduhthlanga leh Kolasib DC Pu H. Dolianbuaia ten an tawiawm a. Khawtlang hruaitu VC te, YMA leh MHIP member ten an tel bawk a ni.