3670/2024-2025

Aizawl, the 31st December 2024: Zanin khan Home Minister Pu K.Sapdanga chuan Aizawl khawpui chhunga kumhlui thlah zana venhimna kalpui dan te endik in Aizawl khawpui chhung hmun then khat leh daifema duty na hmun te a endik.

He hunah hian hnatlang turin Supply Minister Pu B.Lalchhanzova leh Excise & Narcotics Minister Pu Lalnghinglova Hmar pawh an rawn feh chhuak bawk a ni.

Home Minister hian Central YMA Office a tlawh hmasa bera. He hun ah hian CYMA lam atangin Halpuah leh Halmawi khapna kalpui Chungchanga YMA hmalakna te ngaihthlak a ni a. He hunah hian Home Minister Pu K.Sapdanga chuan Krismas leh Kumthar vuakvetah Halpuah leh Halmawi khap tura Sawrkarin thutlukna a siam chhan leh hmalakna kalpui dan te a sawi a. Mipuiin Krismas Urlawk zanah thuawih takin Halpuah leh Halmawi an hal loh avangin lawmthu a sawi.

Halpuah leh Halmawi khapna chungchanga theihtawp chhuahtu YMA te, dan leh thupek kengkawhtute leh abikin mipui zirturna kawnga thawh hlawk tak Media-te bakah Kohhran hmalakna te avangin lawmawm thu a sawi bawk.

Krismas urlawk zan boruak muanawm taka kan paltlang tawh avanga lawmawm a tih thu sawiin zanin, kumhlui thlah zanah pawh kan zavai a thu awih turin mipuite hnenah ngenna a siam bawk.

CYMA Office a inkawmhona hi Pu Lalhmachhuana leh hruaitu dang ten an kaihruai a. CYMA Office a hun hman zawh hnu  hian Duty post hrang hrang te a fangchhuak nghal a ni.

DIG Pu C.Lalthanmawia, Aizawl Bawrhsap Er Lalhriatpuia, Aizawl SP Pu Rex Zarzoliana Vanchhawng, police officer dang te, I&PR team leh Chanchinthar lakhawm tuten Home Minister hi an tawiawm a ni.