3671/2024-2025

Aizawl, the 2nd January, 2025: Kum thum leh thla nga chuang hret Mizorama hun a hman hnuin Mizoram Governor Dr. Hari Babu Kambhampati chuan a hna thar Odisha Governor zawm turin vawiin chawhma khan Lengpui Airport atangin Mizoram a chhuahsan. Governor kal chhuak tur pual hian Chief Minister Pu Lalduhoma chuan Lengpui Airport-ah thlahna hun a buatsaih a ni.

Ama puala thlahna buatsaihah Dr. Hari Babu Kambhampati chuan Mizoram a cham chhunga tawiawmna leh duhsakna hrang hrang a dawn thin avangin lawmthu a sawi a.  Mizoramin hmasawn tura theihna nasa tak a neih thu leh hengte hi chak taka bawhzui a ngaih thu sawiin, inthlanna leh assembly session kalpui dante chu ram chhung hmun dangte tana entawntlak tak a ni, a ti a. Mizo thalaite'n theihna leh thiamna an neih that thu sawiin, thiam thil zirna kawnga intuaihriam leh State pawna hna thawk thei tura hmalak zel a tul thu a sawi a. Mizoram chu a thinlungah a cham reng tawh dawn thu sawiin, Mizoram hmalam hun atan duhsakna a hlan a ni.

Chief Minister Pu Lalduhoma pawhin he hunah hian Mizoram tana tha leh tui a lo sen tawhnate avangin Governor hnenah lawmthu a sawi a. A hna thar tur atan duhsakna a hlan bakah remchang hmasa bera Mizoram rawn tlawh leh turin a sawm bawk a ni.

Dr. Hari Babu Kambhampati hi Mizoram Governor 22-na ni turin July ni 21, 2021 khan Raj Bhavan-ah rinawmna thu tiam tira lakluh a ni a, Mizoramah kum thum leh thla nga chuang hret hun a hmang a ni. Ruahman dan chuan naktuk January ni 3, 2025 hian Odisha Governor ni turin lakluh a ni ang.

Mizoram Governor thar tur Gen. (Dr) Vijay Kumar Singh, PVSM, AVSM, YSM (Retd.) chuan January ni 8, 2025 hian Mizoram a lo thleng dawn a. Ruahman dan chuan a tuk January ni 9, 2025 hian Raj Bhavan-ah Mizoram Governor 23-na ni tura lakluh a ni ang.

Vawiin Governor thlahna hunah hian Speaker Pu Lalbiakzama, Home Minister Pu K. Sapdanga, PWD Minister Pu Vanlalhlana, Chief Secretary Pu Khilli Ram Meena, DGP Pu Anil Shukla leh Official pawimawh dangte an tel a. Governor Dr. Hari Babu Kambhampati leh Lady Govenor Dr. Jayashree Kambhampati te chu ngaihhruina thilpek an hlan bakah an hna thar atan duhsakna an hlan a ni.