Nihnih chhung (23-24 January 2021)  awh tur 69th Plenary Meeting of North Eastern Council chu vawiin khan Pu Amit Shah, Union Home Minister leh NEC Chairman ni bawk hovin Shillong-ah neih a ni a. He meeting ah hian Dr Jitendra Singh, MOS, Ministry of DONER leh North East States Governors, Chief Ministers, Chief Secretaries te leh Planning Secretaries te an tel tha hle a ni. 

Meeting-ah hian Mizoram Governor leh Chief Minister an tel thei lova. Pu Lalchamliana, Home Minister chu an ai awhin meeting ah hian a tel a. Meeting-ah hian thu sawiin Pu Lalchamliana chuan Union Home Minister hova, NE States hotu lu ber ber te leh Central Sawrkar a Ministries / Departments pawimawh ho zawng zawmg kalkhawm a 69th Plenary meeting buatsaih ani chu lawmawm a tih thu a sawi a. Mizoram a NEC project tha tak tak kalpui tawh thin anih thu leh kalpui mek anih thu sawiin hmasawnna hna tam zawk kalpui tura sum leh paiah pawh thuam chak zel ni thei se a duh thu a sawi.

Agenda sawihonaah Pu Chama chuan Mizoram chuan bamboo sector lamah chak taka hma a lak mek thu leh NEC / Ministry of DONER leh Sawrkar laipui pawhin hemi kawngah hian nasa taka min puih chhoh a beisei thu a sawi a, Oil Palm ah pawh NE States zingah hma la hmasa leh hmahruaitu Mizoram anih thu a tarlang bawk. Oil Palm kalpui zelna turah zirchianna mumal neih a pawimawh a tih thu sawiin Oil Palm chingtute tana harsata awm thei leh ram tana tha tur zawka kalpui dan tur mumal tak ruahman hmasak theih nise tha a tih thu a sawi. Horticulture lamah pawh chak zawk leh hlawk zawka hma la thei turin post harvest management lam te, transpostation leh cold storage lam ngaihpawimawh a tul a tih thu a sawi bawk. 

North East India ah investment tam zawk lut thei turin Ease of Doing Business lama chak zawka hma

lak a ngaih thu sawiin Mizoram lam pawhin Ease of Doing Business lam leh Entrepreneurship development lamah chak taka hma a lak mek thu a tarlang bawk.

Project management lamah hmasawnna nei turin multilateral leh bilateral funding agencies te nen technical cooperation neih nasat a thaa a rin thu tarlangin External Aided Project hmu tha lehzual turin funding pattern siamtha a 20% counterpart funding State atanga phut chu tihbo nise tiin a rawt a. Pandemic avanga State sum dinhmun tha lo siamtha tura theihtawp chhuah a tanpuina buatsaih turin Central Sawrkar a ngen bawk.

Mizoram atangin meeting ah hian Dr C Vanlalramsanga, Commisisoner & Secretary, Planning chuan presentation a pe bawk. Home Minister hi Pu David H. Lalthangliana, OSD cum Deputy Secretary Home, Pi Lalnunsiami SRO, Planning leh Pu Malsawmzuala DRC, Shillong ten Minister hi an tawiawm bawk a ni.