Vawiin khan Nehru Yuva Kendra (NYK), Lawngtlai District leh Lai Women's Association (LWA) General Headquarters, Lawngtlai tang kawp huaihawtin Lawngtlai Electric Veng-a LWA Office-ah Parakram Diwas, Swachhata Awareness leh Jal Shakti Campaign pualin hun hman a ni a. LWA member eng emaw zat kal khawmin, Lawngtlai Bawrhsap Dr Andrew H. Vanlaldika chuan Khuallian niin hun a hmanpui a ni.

Dr Andrew H. Vanlaldika chuan khawtlang hmasawn nana NYK hna thawh fakin, tuna LWA te nen programme pawimawh tak tak pathum an huaihawt thei chu lawmawm a tih thu a sawi a. Mi thiamte'n khawvela zirna hmasa ber an tih, 'chhungkua'-a mi pawimawh tak, 'nute' chuan mawhphurhna sang tak an nei a ni tiin, chhungkuaa inzirtirna a that loh chuan ram leh khawtlangin a tuar thin avangin nuho kal khawm chu mahni chhungkua theuh enkawl uluk turin a chah a. Faina a ni emaw, ruahtui dah khawl leh tui renchem a ni emaw, zirtirna tha dang emaw reng reng pawh fate zirtir a, a taka tihhmuhtu nih a pawimawh thu sawiin, fate'n an entawn ber an ni tih vawng reng turin nuho kal khawm chu a chah a ni.

Vawiina hun hman hi LWA General Secretary Pi F. Hranghlunchhungi'n kaihruaiin, Secretary Pi Hmingthanmawii'n hunserh a hmang a. NYK District Youth Coordinator Pi Mercy Sellate chuan programme hman chhan a sawi fiah a. Lawngtlai District Sericulture Officer Pu R. Lalbiakthanga'n thu a sawi bawk.

Faina inzirtirna (swachhata awareness) atana NYK leh LWA General Headquarters-in Lawngtlai District chhunga khaw thlan bik 25-a in leh a vel vawn fai kawnga intihsiakna an buatsaiha in leh a vel vawng fai thaa thlante chu vawiin hun hmanah hian puan chhuah niin, he'ng intihsiakna buatsaihna khaw tina pakhatna atanga pathumna theuhte hnenah lawmman "faina bel" hlan a ni a. Lawmman hi Khuallian Lawngtlai Bawrhsap leh a nupui Pi R. Laltanpuii te'n an sem a ni.

Parakram Diwas (Huaisenna Ni) hi India zalenna sualtu Netaji Subhash Chandra Bose piancham kum 125-na puala hman niin, thalaiteah huaisenna leh ram hmangaihna thinlung tuh a nih theih nana inzirtirna atan sawrkarin a ruahman a ni.

Vawiin hian Jal Shakti - Catch the Rain Campaign (ruahtui khawl inzirtirna beihpui) chu Khuallian chuan a hawng nghal a. He campaign hi thal laia tui hman tur hnianghnar kan neih theih nan leh ruahtui luang mai maiin leilung a tichhe tur ven nan te ruahtui khawl nachang hriatna leh tui renchem leh tuihna venhim kawnga mipuite tihharh thar nana inzirtirna tur niin, NYK hma laknain heti ang inzirtirna hi uar taka kalpui tum a ni.