1044/2022-2023
Aizawl, the 24th June, 2022 : Pu Lalchamliana, Home Minister hovin vawiin ‘International Day Against Drug Abuse and Illicit Trafficking’ denchhenin Trinity Hospital, Silaimual a bawlhhlawh halralna khawl hmangin Mizoram Police ten ruihhlo an man te halral a ni. He hun hi Pu Neihchungnunga, IPS, DIG(CID) Crime leh Chairman, High Level Drugs Disposal Committee in a kaihruai.

Pu Lalchamliana chuan drugs tawlhruk leh hmansual hi khawvel pumin a buaipui a, tih rem dan tur a ngaihtuah reng a ni. Drugs titu te hian an mahni mai bakah, an chhungte leh khawtlang an tih buai thin avangin, drugs ti lo tura inzirna hi chhungkua, zirna in, khawtlangah te uar leh zual a kan inzirtir a ngai a ni a ti. Supply reduction a pawimawh rualin demand reduction tura hmalak mek a nih thu sawiin Minister chuan mipuite hnenah drugs tih thatloh zia kan rilrua tuh ngheh a nih chuan kan ziaawm deuh a beisei thu a sawi. Drug addict te pawh misual ber ang mai a en lovin, damlo tanpui leh enkawl ngai an ni tih rilru puin, drugs dona kawngah Police, Excise and Narcotics, Assam Rifles, YMA, Kohhran te theihtawp chhuah zel turin a sawm.

Pu Lalchamliana chuan Narcotics Control Bureau Office, Aizawl leh Champhaiah dah dan tur ngaihtuah mek a nih thu a sawi a,  vawiin pawh District dang a Drugs Court-in tih ral a phal tawh te pawh tihral a nih thu a sawi. 

Pu Devesh Chandra Srivastva, IPS DGP Mizoram chu khualzahawm niin hemi hunah hian drugs do chu Mizoram Police tana hna pawimawh ber te zing ami a nih thu a sawi.

Tunkar chhung hian district hrang hrang Police ten theihtawp chhuah in ruihhlo dona kawngah hian hma a la a. Thalai te leh mipui hnen ah te hrilh hriat hna (awareness campaign) nasa takin a kalpui a. Awareness campaign hi School 39 ah neih niin Signature campaign pawh hmun tam tak ah neih ani bawk.

Pu Lalhmachhuana, Central YMA Vice President pawhin thu sawina hun a nei bawk. International Day Against Drug Abuse and Illicit Trafficking chu 26^th June, 2022 hi a ni a, mahse Pathianni a nih avangin vawiin khan hman a ni.

Mizoram Police chuan vawiin khan a hnuaia tarlan drugs te hi Trinity Hospital, Silaimual Melthum ah bawlhhlawh hal ralna khawl hmangin an hal ral: 

 Total Quantity        :               934.008 kgs, 27 bottles, 899 tabs/caps 

Total Value      :                       Rs. 2,34,02,17,045 (Local market rate)

                                                 Rs. 23,62,09,40,245 (International market rate) 

Kum 2022 January atanga vawiin thlenga Mizoram Police ten drugs an man chu a hnuaia tarlan ang hi ani.