Vawiin khan Home Minister Pu Lalchamliana hovin ama office chamber-ah Coordination Committee on Traffic Management an thukhawm a, Krismas 2018 leh Kumthar 2019 lo awm tur vuakvetah Aizawl khawpui chhungah ‘No Vehicle Zone’ siam dan tur leh thil pawimawh dangte an sawiho.

Home Minister Pu Lalchamliana chuan kum danga lo tih thin tawh angin Krismas leh Kumthar vuakveta mipui Bazar kea kalte an him zawk nan ‘No Vehicle Zone’ siam leh ngei chu tha a tih thu a sawi a, Committee Member-te nena an sawiho hnuah December ni 21 leh ni 24-ah te ‘No Vehicle Zone’ siam nise tih an rel a. ‘No Vehicle Zone’ hawn a nih hian kawngsirah thil zuar inphochhuak tam lutuk chuan kawngpui an tichep thin chu khap/phal tawh loh thung nise tih Committee chuan a rel bawk a ni.

Home Minister Pu Lalchamliana chuan kumin Krismas leh Kumthar lo awm turah pawh mipuiten hlim leh thlamuang taka hun an hman theih nan sorkar khap - halpuah leh halmawi, silai lem a mu kap chhuak thei tumahin zuar lo tur leh hmang lo turin a chah nawn leh a. Mizoram mipui zawng zawngin thlamuang leh hlim takin Krismas leh Kumthar an hman theuh theih nan duhsakna a hlan bawk a ni.