Vawiin khan Minister of State Pu Robert Romawia Royte chuan a Department chan 3 - Sports & Youth Services, Tourism leh Information & Communication Technology-a officer-te ama office chamber-ah meeting a neihpui. Heng a department chana hnathawkte chu office a luah tan nia a lo ngen tawh angin, office hun vawn dik ngaih pawimawhna kawngah midangte tihhmuhtu ni turin a chah nawn.

Zing dar 9:00-ah I&CT Department officer-te meeting neihpuiin Department hmalak mekna leh hmabak awm bawhzui dan tur a sawipui a. I&CT chu hlemhletna dona, tihbona leh langtlang sorkar siamna hmanraw pawimawh tak a nih a beisei thu leh ‘Good & Smart Governance’ siamna kawnga hmalatu department ni tura hmalak a duh thu a sawi. Inbiakpawhna lama mawhphurtu service provider hrang hrangte sawihopuia meeting neih thuai a tum thu a sawi bawk.

Vawiin Assembly Session zawh hnua khan Tourism Department officer-te meeting a neihpui nghal a, Department hnathawh dan leh hna kalpui mekte sawi hovin chak zawka hmalak dan tur an sawiho. Department-in chak zawka an kal theihna tura harsatna hrang hrang an sawite pawh a thei ang anga sutkianpui a tum thu a sawi bawk.

Tourism Department nena an meeting zawh hian Sports & Youth Services Department officer-te meeting a neihpui leh a. Minister chuan India leh khawvel huapa Mizote min pholangtu chu Sports a nih thu leh thalaite tun aia nasa zawka infiamna khawvela hma an sawn theih nana hmalak a tum thu a sawi a. Mizoram State Budget-a innghat mai lova, Central Ministry hrang hrang atanga sum tam zawk hailut theih tura chak zawka hma la turin officer kalkhawmte a chah a ni.