2891/2022-2023
Aizawl, dated the 1st December 2022: Vawiin khan Mizoram Assembly conference hall-ah Home Minister Pu Lalchamliana chuan State Level Conference on Anti-Human Trafficking chu khuallian niin a hmanpui a, Pu Devesh Chandra Srivastva, IPS DGP, Mizoram chu Khualzahawm a ni.

Home Minister Pu Lalchamliana chuan mihring hmanga sumdawnna (human trafficking) chungchang zirho leh sawiho-na tur conference buatsaih a ni chu lawmawm a tih thu a sawi a. He conference hian trafficking sual do leh invenna kawngah nasa takin a puih a beisei thu a sawi. Khawvel in a buaipui em em mihring hmanga sumdawnna hi Mizoram ah pawh a hluar chho zel a, mihring dikna chanvo inrahbeh sakna lian ber leh sual pawi ber zing a mi a ni tiin kum 2000 hnu lamah Mizoram ah human trafficking case 35-a awm tawh a: Hmeichhia 89 leh Mipa 6-te chhanchhuah tawh niin pawikhawihna-a inhnamhnawih mi 64-te man an ni tawh ani a ti. Khuallian Pu Lalchamliana chuan mihring hmanga sumdawn dona kawngah Mizoram Police te inpekna leh hmalakna chu chhuanawm a tih thu a sawi a. State chhung leh pawn lamah nasa takin chhanchhuah hna an thawk thin a ni a ti. Mihring nun tichhe zawng a eizawnna hi a zung atanga phochhuah a ti rem tur chuan Mizoram Police leh pawl hrang hrang thawhhona a pawimawh thu sawiin; a tuar tute chhanchhuah mai piah lamah nunphung pangngai a an nun leh theih nan a chhawmdawl dan thlengin ngaituah a ngai hle a ti.

Khualzahawm Pu Devesh Chandra Srivastva, IPS DGP Mizoram pawhin thusawiin Mizoram CID te inpekna fakawm a tih thu a sawi a. Mihring hmanga sumdawnna hi Mizoram-ah chuan hmeichhia leh naupang chungah a nasa ber a; retheihna leh chhungkaw harsatna vanga tang an tam ber a ni a ti. Misualte hian hna tha zawk pek tiamin ramdangah hruai in an bum ta thin tih sawiin, Placement company leh pawl hrang hrangte nen tangkawpa hmalak a ngaih thu a sawi a. Tunhnai a Myanmar leh Bangladesh rambuai vanga raltlante chu chhawmdawl an ngai lehzual a, ven an ngai em em a ni tiin conference hian rah tha a chhuah ngei a rin thu a sawi bawk.

Vawiin a Anti-Human Trafficking Conference-ah hian sawm bik pawl hrang hrang CYMA, MHIP, KTP, MTKP, Salvation Army Hqrts., MZP, KTP, Young Chakma Association, Salvation Army Youth leh MUP aiawh te an kalkhawm a, Pu Lalhuliana Fanai, IPS DIG CID & Nodal Officer, AHTU Mizoram in kaihruaiin Pu Deotosh K.S.Singh, IPS, SP CID (Crime) & Asst. Nodal Officer, AHTU in lawmthu sawiin hun a khar a ni.

Conference hawnna inkhawm zawh hian Mihring hmanga sumdawnna chungchang zirhona leh sawihona neih nghal bawk a ni.