No.4442/2020-2021
Vawiin chawhnu dar 2 khan Pu Lalchamliana, Home Minister chuan Brig. Vinod S, DIG, 23 Sector Assam Rifles kovin tun hnaia Mizoram Sorkar leh Assam Rifles inkara thu inhmu lo deuh awm mek chungchang a sawipui.
Home Minister hnenah hian Brig. Vinod S chuan tun hnaia thil thleng chungchang Assam Rifles thlir dan leh harsatna an tawh te a sawi a. Home Minister hian Assam Rifles lam harsatnate a ngaihthlak sak rualin Mizoram Sorkar duh dan a hrilh ve thung a ni. Ramri ven kawngah te, ruihhlo leh thil tha lo dang venna kawnga Assam Rifles te hna thawh chu Mizoram Sorkarin a hria tih sawiin thawhhona tha awm zel se a duh thu Home Minister chuan a sawi a; thu chhuah siam zung zung bansanin harsatna an nei a nih chuan ama hnena hrilh hreh lo tur leh dawhkan kila sawiho hmasak thin a that thu a hrilh a ni. COVID-19 avanga Mizoram Sorkarin invenna leh fimkhurna tura ruahmanna a siam te pawh indanna ni lovin kan him tlanna tur zawk a nih avangin zawm zel turin a hrilh bawk.
Brig. Vinod S chuan Ministry of Home Affairs in state leh state inkar leh state chhunga vahvel phalna a pe chungin an chetvelnaah Mizoram Sorkar ruahmanna te zawm hi an duh ber a ni tih a sawi a. Mizote nen thian an nihna vawnhim a duh zia te, social media leh thildanga thu vawrh darh hmaa amah biaa titipui duh tan a inhawn reng thu te, a enkawl Assam Rifles sipai zingah dan bawhchhia leh che mawi lo an awm a nih chuan chiang taka finfiahna nen report thehlutin an phutawk hremna a pek zel tur thu te a sawi ve bawk a ni.
