No.7557/2020-2021

Vawiin khan Home Minister Pu Lalchamliana'n Set Free Ministries-in (SFM) Central Jail tang te tana Pathian Thu zirna course vawi 3-na, an buatsaih Certificate semna hun Graduation Day a hmanpui.

 

Pu Lalchamliana chuan mihringin taksa lam mamawhna - ei leh in, silh leh fen leh adangte kan mamawh angin thlarau nun enkawlna kan mamawh  bawka, Pathian Thu zirtira hetiang rawngbawlna lungin tangte tan SFM in an nei thin chu a ropuiin a ngaihsanawm tih sawiin, chhunzawm zel tha a tih thu a sawi. Mimal duhthusamah chuan lungin te ruak vek sela, tang tumah awm lo se tih hi a ni a, mihring rilruah sualin rawng a bawl avangte, dan hriat loh avangtein lungin ah mikhual tur an awm fo thin a, chuvangin mi tupawhin Dan hi a lal ber a, Dan reng reng tha taka zawm a pawimawh tih hi kan hriat nawn fo a tul a ni, a ti.

 

Sawrkarin lungin tang ten an tan chhungin thiam thil an zira, lungin atanga an chhuah hunah nun kawng dik zawha eizawnna kawng an neih chu a ngaipawimawh hle tih sawiin, sofa siam, cement mistri hna zir te leh adangte a kalpui mek a, electric wiring leh Aluminium chokut leh tukverh siam training pawh MYC nen tang dunin buatsaih vat tum a nih thu a sawi. Hetianga ruahmanna Sawrkar leh pawl hrang hrang ten an chhawpchhuah te chu hmang tangkai turin lungin tan mekte a chah bawk a ni.

 

Lungin-a tang mekte chu hrehawm leh zahthlak thil a ngai lovia, Jail-a an hun hman chu  Pathian Thu nen mahni insiamthat nan hmang a, rilru thar siam a, tum thar nei a, an chhuah hunah nun kawng pangngai zawh tura mahni inbuatsaih turin a fuih a. Khawvel hruaitu ropui Mahatma Gandhi, Nelson Mandela leh Aung Sang te pawh hun rei tak lungin ah tan thu sawi langin hrehawm an tawrh avangin an nun a chel a, a hnua an mipui leh an ram tan theuh mi ropui a ni, a ti.

 

Home Minister hian he exam pass zawng zawng hnenah Certificate a hlan a ni. Set Free Ministries te buatsaih Bible zirna hi Central Jail a tang mi 159 in an zir a, an pass vek a ni. Hetiang zirna hi SFM in kum 2018 atangin Central Jail-ah hian an lo kalpui tawh a ni. 

 

Graduation Day programme hi Prof. Lianzela, Board Member, SFM in a kaihruai a. Degree hlanna hi Rev. K. Lalzuala, Director/Secretary in neiin Bible zirna an kalpui dan hrilhfiahna Pi Laltanpuii'n a nei a ni. 

 

Central Jail-ah hian tang mipa 562 leh hmeichhia 42 an awm mek a ni.

Attachment

  • Loading attachment...