Vawiin khan Home Minister Pu Lalchamliana'n District Jail, Aizawl a tlawh a, tang te Krismas thilpek a hlan a. Home Minister hi IG Prisons Pi Maria CT Zuali’n a tawiawm a ni.

Pu Lalchamliana chuan tang te chu an tihpalh thu thil ah te emaw sual vang hrim hrim pawh hi lo, thil tihsual avanga tang emaw an nih hlawm a rin thusawiin misual sim thei loh an awm ka ring lova, helaia hun in hman chhungin nun tidanglam thei rilru nei turin ka chhah duh cheu, a ti. Tang te chu helai hmun lut nawm leh tawh lo loh an nun siam tha tura fuihin chhungkau, veng leh ram tan an chhuah hnuah mi tangkai leh mi thlawhhlak an nih thei a rin thu a sawi bawk.

Home Minister chuan Chief Minister Pu Zoramthanga kaihhruai Sawrkar chuan jail te hi inhremna hmun nilovin insiamthatna hmun ah an ngaih thusawiin Commerce & Industries, ICT leh Department dangte nen jail tangte tan eizawnna kawng kawhhmuhna ang chi hmalakna Sawrkar in a kalpui mek a, mahse duhthusama chakin kan la kal thei lova, Central Jail ah te chuan puantah te, electronics leh computer zirna ang chi kan buatsaih chho tan mek a, hetiang hi District Jail Aizawl ah pawh a thei ang angin kalpui kan tum a ni, a ti bawk.

Tang(convict) ten an tan hun pawh tawi sak turah Home Minister hnenah ngenna(remission) an thehluh chu ni 5 remission pek an nih tur a puang a. Krismas ruai atana a tula an hman atan tang te leh hnathawk te sumfai a pe bawk a ni.

Pi Maria CT Zuali, IG Prisons chuan Sawrkar in tang te a enkawl dan tlangpui a tarlang a ni.

District Jail ah hian tang 83 an awm mek a, chung zinga mi 21 chu convict, an chungthu rel tawh niin a bak zawng chu under trial, an chungthu Court a kal lai mek te an ni.