952/2022-2023
Aizawl, the 18th June 2022 : Home Minister Pu Lalchamliana'n vawiin khan Vaivakawn Auditorium ah Mizoram Arm Wrestling Association (MAWA) in ban elhchak intihsiakna ‘44thNational Arm Wrestling Championship, May ni 31 leh June ni 5 inkara Hyderabad a neih a lawmman la te chawimawina leh certificate semna hun an buatsaih chu khuallian niin a hmanpui.

Home Minister Pu Lalchamliana chuan rampum huapa Arm Wrestling inelnaa hlawhtlinna chang a medal la te chu a lawmpui thu sawiin Mizoram an chawimawi a ni, a ti a.

Zirlai a ni emaw, infiamna leh inelna ani emaw, a ti tha ber nih hi thil har tak a ni, hlawhtling turin tumruhna, mahni inthununna leh mahni thil tih tumah inpumpeka insawrbingna nei a pawimawh ber a. Hengte hi infiamna mai ni lo kan zirna kawng ah te, kan eizawnna kawngah leh kan nitin nunah a pawimawh dan a in ang vek a ni, a ti. Infiammite tan mahni tum ah in pum pek chu thil pawimawh ber a anih rualin sports discipline khawi berah hming an chher thei ang tih chu chiang taka an ngaihtuah leh an thlan fuh thiam a pawimawh hle thu a sawi a. Mizo te pumrua ngaihtuahin contact sports te hi hming kan chherna bika ka ngai a, hetah hian nasa leh zawka tan lak a ngai tiin Home Minister chuan a sawi a ni.

Kumin May ni 31 leh June ni 5 inkara Hyderabad a 44thNational Arm Wrestling Championship neihah Mizo ban elhchak mi 23 an tel a. Anni hian Category hrang hrangah Gold Medal 15, Silver Medal 8 leh Bronze Medal 6 an lo hawn a. Team Runners Up Trophy Mizoramin Team hian an lak bakah Senior Men Category ah Lalhruaitluanga leh Junior Boys Category ah Raymond K. Lalrinpuia te hian Champion of Champion nihna an hauh bawk a ni.