953/2022-2023

Mamit 18th June, 2022 : Vawiin khan Govt. Mamit College, Mamit-ah Disaster Management and Rehabilitation Department leh Mamit District Disaster Management Authority tangkawpin an buatsaih karhnih (Ni 7-18 June, 2022) chhunga chhanchhuahna hna thawh dan inzirtirna 2nd Batch Training for Up-Scaling of Aapda Mitra Scheme neih chu zawhfel niin kharna hun hman a ni a. He hun hi Pu Benjamin Lalzama, Director, Disaster Management and Rehabilitation Department chuan a hmanpui.

Pu Benjamin Lalzama chuan Volunteer training-te chu thil chi hrang hrang an zirchhuahte District mipuite tan tangkai taka hmang zui a, disaster lo thlen huna che chhuak zel turin a chah a. Search & rescue operation hmanraw chi hrang hrang an dawnte chu tangkai taka hmang turin a chah bawk.

He hunah hian Pu Lalrokima Chenkual, Deputy Director, DM&R Department hnen atangin Training Report ngaihthlak a ni a. Upscaling of Aapda Mitra training hi Mamit District-ah neih hmasak ber a ni a, District dangah neih chhunzawm leh zel tum a ni a ti.

Mamit District Disaster Management Authority atangin Volunteer-te fuihna thu ngaihthlak niin anmahni khua/veng theuhah disaster thleng a awm chuan a rang thei anga mahni VC, BDO, Zonal Officer leh DC Office lamah hriattir vat turin leh che chhuak thuai zel turin ngen an ni a. Kumin 2022 furpui hi ruah a tlak tam avangin lei a min nasa tawh a, beng chhi (alert) rana mahni hmun theuha awm turin an chah a. Volunteers aiawh atangin thusawi ngaihthlak a ni bawk. 

Aapda Mitra 2nd Batch-a Training hi mi 67 an ni a, 1st batch-a lo training tawh mi 33 te nen an vaiin mi 100 an training chhuak tawh a ni.

2nd Batch-a Training hi Mamit, Phaizau, Dampui, Nalzawl, Zawlnuam, Suarhliap,    Thinghlun, Chhippui, West Phaileng leh    Tuidam khaw thalaite an ni a. Training hmunhma phal taka hmantirtu Govt. Mamit College Principal leh a thawhpuite chungah DM&R Department-in lawmthu a sawi a ni.

Training chhuakte hian hmanraw (equipment) chi hrang hrang, Personal Floatation Device ( Life Jacket), Torch/ Emergency light (Solar), Safety Glove, Pocket Knife, First Aid Kit, Gas Lighter, Whistle, Water Bottle, Ruck Sack, Thosilen, NDMA Uniform & SDMA/DDMA Uniform, Safety Googles, Safety Helmet,    Rain Coat, GUM Boot leh Training Certificate an dawng theuh a ni.

Training kharna programme hi DM&R Department Directorate atangin Director, Joint Director, Deputy Director leh Superintendent te'n an hmanpui a. Mamit DDMA aiawhin Addl. DC, Mamit District leh DOs, DM&R Cell, DC Office Mamit te an tel bawk a ni.