1111//2023-2024

Aizawl, the 12th July 2023 : Home Minister Pu Lalchamliana, Disaster Management & Rehabilitation enkawltu ni bawk chuan vawiin khan Pachhunga University College ah leihnuai chanchin chungchang leh heng kaihhnawih thiamna thar te hman tangkai dan zirhona International Workshop on Geodynamics and Advances in Geophysical Methods for Exploration and Geohazards tih chu a hawng. Ni hnih awh tur workshop hi Department of Geology & Geophysics, PUC leg Department of Geology, Govt. Zirtiri Residential Science College tangkawpte buatsaih a ni.

Workshop hawnna programme tawite PUC Seminar Hall a neiha thusawiin Pu Lalchamliana chuan International Workshop thupui leh a thil tumte chu Mizoram dinhmun leh kan leilung awm dan enin thil tangkai tak, lei che kaihhnawih chhiatna lakah kan him thei dante, kan pumpelh thei dante leh chhiatna a lo thlen pawn ruahmanna tha siamna kawngah kawngkawh hmutu  Workshop tangkai tak a nih ngei ka beisei, a ti. A enkawl Department DM & R leh Department of Geology, PUC chuan thawhhona tha neiin lirnghing nat dan tehna khawl broadband seimic station pawh college hmun hmaa bun a nih thu te leh PUC mithiamten Hunthar leitlahniam chanchin pawh zirchiangin an enzui reng reng thu te a tarlang a ni.

Pu Lalchamliana chuan hetiang workshop zirna sang pahnih tangkawpten an buatsaih hi science zir zelna leh zirbingna lamah thil tangkai tak, thiamna intawm thei hmanraw tha tak a ni thei a, hei hi scientific research pawhin a tum pawimawh tak a ni, a ti. Workshop-a thuhmahruai sawi tura sawm Resource Person Prof. Mrinal K. Sen, Associate Director, Institute of Geophysics, Jackson School of Geosciences, University of Texas at Austin, USA chu amah senso in Workshop-a rawn kal chu a entawntlak hle ni a hriat thu sawi langin a thiamna sang neih te chu Workshop a tel ten an chawr tangkai ngei a beisei tih a sawi bawk.

Workshop hawnaah Dr. Shiv Raj Gurung, HOD, Dept of Geophysics PUC chuan lawm thu sawiin, PUC Principal, Prof. H. Lalthanzara’n pawhin thusawina hun neiin college in tunhnaia hmasawnna a neihte leh zirna in sang tehnaa tunhnaia rampuma college thaa thlanna PUC a lan thu a tarlang a. Keynote Address sawitu Prof. Mrinal K. Sen chuan Leihnuai hausakna zawnna kawnga Geophysics leh Seismology zirna pawimawih dan leh khuarel chhiatna, a bik takin Lirnghing laka lo inven kawnga a pawimawhna leh hmalak theihna te he hunah hian a sawi a ni.

Ni hnih awh tur Workshop ah hian geology leh geophysics lama thiamna nei mithiam 12 te paper zirho a ni dawn a ni. Dr Laldinpuia, Associate Prof, MZU paper, June ni 22, 2020 Tuipuiral Lirnghing in a chhehvel khua te ah nghawng aneih dan LiDAR leh DGPS khawl hmanga a zirchianna te pawh a tel a ni.

Kumin chhungin Pachhunga University College a department hrang hrang ten chuan Mizoram University tanpuina in National leh International level Conference, Workshop leh Seminar 20 chuang an buatsaih tawh a. Pachhunga University College a, Department of Geology leh Disaster Management and Rehabilitation Department hian Mizoram Lirnghing zirchiannan Pachhunga University College ah Broadband Seismic Station (Lirnghing chiang taka hriattheihna) an lo dah fel tawh a. Chumai bakah Hunthar leitlahniam hi an thawhdunna bawkin hun rei tak chhung an lo zirchiang tawh bawk ani.