1110//2023-2024

Mamit 12th July, 2023 : Er. Lalrinawma, Hon'ble Minister, Social Welfare & Tribal Affairs, AH & Vety, Excise & Narcotics, Sericulture Department chuan vawiin khan Lengpui-ah Sustainable Animal food Distribution System to check inflation of meat and its end product, Mizoram under Special Assistance to State for Capital Expenditure (SASCE) 2020 - 2021 lungphum a phum.

Programme tawi Rainbow Holiday Home, Lengpui-a hmanna-ah khuallian AH & Vety Minister chuan kan ramah ran vulh a hautak em em a, a chhan chu 70% vel ran chaw manah kan hman thin vang a ni tiin ran chaw man sang zel ven nana hetiang project a enkawl Department-in an siam chu lawmawm a tiin a buaipuitu Officers te fakawm a tih thu a sawi a. Tunlaia ran natnate 70% chu mihringah pawh kan kai ve theih anih avangin kan ran vulhte an hrisel theih nan theihtawpchhuaha kan enkawl that a pawimawh a, an hrisel theih nan chaw tha hmanga kan hrai puar a pawimawh hle bawk a ni a ti.

SEDP hnuaiah pawh Sorkar chuan ran vulh a ngaipawimawh hle a, beneficiary ngah ber an nih hial thu sawiin SASCE project hnuaiah hian kan ramah ran chaw tha, man tlawm zawka ran vulhtute'n an hmuh theih ngei a beiseiin duhsakna a hlan bawk a ni.

Khualzahawm Er. H. Lalzirliana, MLA, Vice Chairman, Road & Infrastructure Development Board chuan SASCE Project hnuaiah Mizorama a hmasa ber ni tur a bialin an nei thei chu Sorkar chungah a bial mipuite aiawhin lawmthu a sawi a. ASF natna avangin vawk vulhtute'n an tuar nasa em em a, rel thlen theih lohna anih avangin road transportation cost a sang hle thin a, ran vulhtute'n ran chaw manah harsatna an neih phah thin a ni tiin Lengpuia rel hmanga Raw Materials lakluh a, finish product siamna hmunpui anih dawn avangin Mizoram chu ran chaw-ah kan intodelh ngei a beisei thu a sawi a. Lengpui khua chu khaw lian tak ni chunga VC pakhat hnuaia awm a, lungrual taka Local issue awm lova sorkar ruahmanna te an kalpui thei thin chu lawmawm a tih thu a sawi bawk.

Khualzahawm tho Pu C. Lalmuanpuia, MLA, Vice Chairman, SEDP Board, Vety etc. pawhin Mizoram chu Sa leh Artuiah te tun aia nasa zawkin engtin nge kan intodelh ang tih Sorkarin a ngaihtuah mek laia Lengpui khua-a ran chaw sawngbawlna hmun awm tura ruahmanna kalpui chu thil lawmawm tak a ni tiin Rel head-in a tlawh phakna hmunah Vety Department te'n ruahmanna an siam chu remhria a tiin ran vulhtute tan kawl a eng dawn hle ni-a a hriat thu a sawi a. Mizote chuan kan hunpui te Vawk leh ran tel lovin kan hmang thei lova, chuvang chuan he project lo awm tur hi a lawmawm takzet a ni tiin ran chaw-a kan intodelh theih nana ruahmanna siamtu Vety Department chungah leh project hlawhtlin theih nana ram petu Pu V. Malsawmdawngliana, Chanmari chungah lawmthu a sawi bawk a ni.

Sustainable Animal Feed Distribution System to Check Inflation of Meat and its End Products Project Amount hi ? 465.00 Lakhs niin Feed Godown Phase I, II & III, Digital Weighing Bridge (Civil, Machinery & Technical Quarters), Manager Quarters cum Site office, Labour Shed bakah Bio-Security Fencing te awm tura ruahman a ni. He project hian a tum ber chu ran vulhtute'n man tlawm zawka ran chaw an lei theihna tur kawng hawnsak te, engtiklai pawha ran chaw tha leh man tlawm lei tur awmtir reng te, ran chaw chawk luhna man tihniam tura Sairang/Sihhmui rail station hnai vaia Feed Godown din anih bakah Company lian zawk hnen atanga tum khata ranchaw tam tak lakluh theihna kawng sial te a ni.

Vawiin lungphum phumna hun hi Pi Lalzarmawii, IAS, Secretary, AH & Vety Department chuan kaihruaiin Dr. Lalrinpuii Sailo, Director, AH & Vety Department chuan lawmthu sawina a nei a ni.