1109//2023-2024

Aizawl, the 12th July 2023: Vawiin khan Woodland Hill Conference Hall, Zonuamah Rural Department hnuaia scheme pawimawh tak tak kalpui dan thlirho na leh chak zawk kalpui dan tur sawihona neih a nia. Rural Development Minister Pu Lalruatkima chuan he hun hi a hmanpui a ni.

Pu Lalruatkima chuan Rural Development Department chu thingtlang mipui te chawikanna atana department pawimawh ber leh thingtlang mite ta deuh bik a ni tih a sawi a. Rural Development a thawk te chu officer lian zawk atang hnahniam zawk thawktu thleng a hawihawm, dawrnuam leh thingtlangmite tana dawr nuam ni chhunzawm turin a chah a. BDO te pawh an bialtu MLA te nen inlaichinna tha nei turin a chah tel bawk.

Rural Development hnuaiah scheme pawimawh tak tak te kum 5 chhung khan kalpui a ni tih a sawi a. MNREGA phei chu India ramah ni 100 ah 100 kalpui thei awm chhun state an ni a. Hei hi hlawhtlinna a nih bakah Hripui a len lai pawha chhuanchham awm lova chhungkaw tam tak kan awm theihphahna a ni a, a lawmawm takzet a ni a ti. MzSRLM hnuaiah Self Help Group(SHG) tam tak Mizoram dung leh vangah an awm tawh a, heng SHG te hian kawng hrang hranga hma lain sum an thawkchhuak mek tih a sawi a. PMAY(Grameen) - miharsate insakna tanpuina pawh chak takin kalpui mek a ni a, third party avangin harsatna te nau awm mahse kuminah chuan AWAAS+ pawh an zo hmanturah a ngaih thu a sawi. Amrit Sarovar hnuaiah lui leh tuihna te hmun tam takah khuah a ni a. Heng te hi ranvulhna, huan thlai enkawlna bakah ei in atan leh thil tangkai danga hman tur a ni a. He hmalakna kawngah hian Mizoram chu a thawk tha ber zinga mi a ni a ti. Heng hmalakna te bakah hian SIRD&PR leh SAU hmalakna te a sawi lang bawk.

Pu Lalruatkima chuan Mizoram RD hmalakna te chu tha tih a hlawh avangin State danga atanga rawn zir tute an awm a, Puducherry RD Minister pawhin a rawn zirchiang tawh tih sawiin Monitoring Official tam tak Phai lam atanga lo kal te pawhin an hnathawh te an rawn endik thin tih a sawi a. RD hnuaia hmalakna te chu, a thawktute inpekna azarah endik leh belchian a dawl thin a, a lawmawm takzet a ni a ti.

Rural Development a enkawl chhunga Department tihchangtlunna leh mipui tana tangkai bawk si hlawhtlinna an neih chu RD Block 2 - Kawrtethawveng RD Block leh Tlabung RD Block te ni tih a sawi a. Department chhung bikah DRDA thiah taka officer leh staff 87 hna ngheta dah an nih bakah Project Director, DRDO posts MCS officer JAG post atana rinluh te pawh hlawhtlinna langsar tak a ni tih a sawi tel. RD Block kilkhawr zawk leh Aizawl atanga hla deuh zawkah te Panchayati House engemaw zat sak tawh niin sak mek a ni a. Hengah te hian mikhual leh Sawrkar hnathawk zin veivak tan thlen theih a ni a ti bawk. RD officer te chuan an hlawhtlinna te chu duh tawk lovin thingtlangmite tana hmasawnna Lian zawk a awm theih na turin he meeting-ah hian ngaihdan thawhhona, sawihona nei chhunzawm turin a chah a ni.

Pu R.Zarzosanga, Commissioner & Secretary in Rural Development Department hnuai Scheme hrang hrang Review Meeting leh Brainstorming hawnna a program hi a kaihruai a. He hunah hian Project Director, DRDO leh BDO ten scheme hrang hrang sawiho hmain presentation an pe a. Pu R. Lalthazuala, Director, RDD chuan lawmthu sawiin huntawp a khar thung a ni.