1108//2023-2024

Aizawl, 12th July, 2023: Union Minister of State for Agriculture & Farmers' Welfare Pi Shobha Karandlaje chuan vawiin khan College of Veterinary Sciences & Animal Husbandry, Selesih-ah Bio Safety Level-II Laboratory (BSL-II) leh Mushroom Spawn (Seed) Production Unit a hawng a, Agriculture Minister Pu C. Lalrinsanga pawhin he hun hi a hmanpui a ni.

Hawnna inkhawmah Union Minister of State Pi Shobha Karandlaje chuan Mizoram sawrkarin a lo mikhual danah lawmawm a tih thu a sawi a. Prime Minister Narendra Modi a'n loneitute/kuthnathawktute a ngaih pawimawh ber an nih thu sawiin an hmasawnna tur scheme tam tak ruahman a nih thu a sawi a. Sawrkar hmalakna avangin khawvelah thlai chi hrang hrang engemawzat leh bawnghnute thawnchhuak tam ber kan ni a. Hetih rual hian India ram chhunga chengte ei leh bar hnianghnar taka kan la intodelh thei lo thin hi kan vei em em a ni a ti a. Mizoram chu mihring cheng an tlem avangin ei leh bara intodelh tura tan lak a harsat loh a rin thu a sawi a. A bik takin sawrkarin kuthnathawktute tana ruahmanna hrang hrang a siamte ngaihven turin a chah a, nimin lama Champhai a tlawhnaah PM Kisan Scheme hnuaia loneitute a kawm thu sawiin, an hamthatna tura sawrkar scheme hrang hrangte an hriat loh zia a hmuhin pawi a tih thu a sawi a, sawrkarin an tana ruahmanna leh hamthatna chi hrang hrang a siam te chu ngaihven a chhawr tangkai turin a chah a. Kuthnathawktute hrilhfiah leh zirtirna kawngah tan lak a ngai hle tih a sawi bawk a ni.

Vety College Zirlaite chu an zirlaiah taima taka thawk tura chahin an thiamna zirchhuahte chuan kuthnathawktute hnen a thlen loh a, kuthnathawktuten hmasawnna atan an hman loh chuan awmzia a awm dawn lo tih sawiin, kuthnathawktute hnen thleng pha ngei thiamna leh inpekna zirchhuak turin a chah a ni.

Pu C. Lalrinsanga, Agriculture Minister, Govt. of Mizoram pawhin thusawina hun hmangin Central Agriculture University, Imphal hnuaiah Mizoramah Horticulture College, Thenzawl leh College of Veterinary Sciences & Animal Husbandry, Selesih te din a nih thu leh kawng hrang hranga Mizoramin hma a sawnpui thu a sawi a. Mizorama loneitute/kuthnathawktute tharchhuah a lo pun zel theihna tura hmalakna chi hrang hrangte a tarlang bawk a, BSL-II leh Mushroom Spawn (Seed) Production Unit te chu Mizoramin thlai, thei rah leh ranvulh lama hmasawnna leh malsawmna thar thlentu a nih ngei a beisei thu a sawi a ni.

Union Minister of State hian College of Veterinary Sciences & Animal Husbandry-a KVK ten exhibition an buatsaih a en bakah PM Kishan Scheme hnuaia kuthnathawktute nen an inkawm a, loneitute harsatna tawh chi hrang hrangte a ngaihthlaksak a, a tul anga hmalak a nih tur thu in a chhang a ni. Union MoS hian Mizorama loneitute tan hmunhma zau tak neih a har avangin thlai leh thei rah an chin bakah ran vulh tel thin ni se awmzia a neih a beisei thu a sawi bawk a ni.

Bio Safety Level-II Laboratory (BSL-II) hi College of Veterinary Sciences & Animal Husbandry, Selesih-a awm tur a ni a. Mushroom Spawn (Seed) Production Unit hi KVK ( Krishi vigyan Kendra), Aizawl-ah dah a ni.

Dr Anupam Mishra Vice Chancellor, Central Agriculture University, Imphal pawhin he hunah hian thu a sawi.