Home Minister Pu Lalchamliana chuan vawiin khan Kolasib Diakkawn YMA Hall ah Kolasib Mizo Students Union buatsaih Seminar on Mizo Nationalism and Salute the Heroes chu khuallian niin a hmanpuia, FCS&CA Minister Pu K.Lalrinliana chu uaptu niin he hun hi a hmanpui bawk.

Home Minister chuan Mizo Nationalism leh Hnam pasaltha te puala Seminar buatsaih ani chu thil lawmawm tak ani tiin kan Hnam ziarang, nunphung leh ngaihhlut zawng te vawng nung renga Ram leh Hnam tana nunna hlan tute kan hre reng tur ani ati.

Khuallian chuan Mizo Nationalism han tih hian kan zinga cheng ve hnam dang, sakhaw dangte nen inrem taka chengho chunga Mizo Hnam ziarang, nunphung, ngaihhlut zawng leh kan nihna te (culture, values and traditions) humhim chung si a hmasawn tura ke pen ani tiin Ram leh Hnam zahawm ni tur chuan Intodelh a ngai a chumi a tan chuan mitin in kan thiamna leh theihna te kan hman tangkai a ngai ani ati.

Pu Lalchamliana chuan Mizo Nationalism humhimna tha tak chu zirna a nih thu sawiin  Mizo ten kan Rama Sawrkar hna pawimawh tak tak kan chelh theihnan All India Service leh Central Service a tlin tam a pawimawh thu a tarlang a, hemi bakah hian eng line pawh zawh ila tumruhna, rinawmna leh taimakna kan nunpui chuan hlawhtlinna in min zui dawn a, chu chuan mahni min chawimawi bakah kan nu leh pa, khawtlang leh Ram leh Hnam kan chawimawi dawn ani a ti.

Home Minister chuan Bru raltlante hruaikir turin Sawrkar Laipui, Mizoram Sawrkar leh Tripura Sawrkar chu a inpuahchah mek thu tarlangin October ni 3 atanga laklet tum Bru te chu an lo let anih chuan Mizo ten hawihhawm takin lo lawm ila, tharum thawhna tel loin kan Hnam ziarang thlauhthla silo in kan chengho thei ani ati. Hemi bakah hian Sawrkar chuan ILP kalphung chu khawl kaltlanga kalpui turin (computerized ILP system) hma ala chho meka, Sawrkar in mipui te tana tha ber tur ngaihtuaha kawng hrang hranga hma a lak na ah mipuite chu tawiawm turin a sawm a ni.

MOS Pu K.Lalrinliana FCS&CA changtu chuan Mizote chu Pathian hriat Hnam kan ni tiin Kristianna zawn atang pawhin Intodelh tur hian mawhphurna sang tak kan nei a, Rim taka thawkin mahni mamawh khawp tharchhuah chu Pathian ina min duan dan pawh ani a ti. Intodelh tur hian kawng hrang hrang a zawh theih a kuthnathawk an awm laiin zirlai leh lehkha thiam tamtak an awm a, kan thiamna leh finna te chu Ram leh Hnam intodelh kan nih theihnan engtin nge kan hman tangkai ang tih mahni inzawh fo a pawimawh ani a ti.

Pu K.Lalrinliana chuan Mizo Nationalism humhim turin mi tamtak in nunna hlu tak an hlan tawh a, ala dama te hian Ram leh Hnam hmasawn kan nih theihnan mawhphurna kan nei theuh a, tum mumal neia lehkha zir te bakah kan zirchhuah te chu Mizoram in a chhawr tangkai ngei theihnana ke pen ve angai ani ati.

He hunah hian Hnam Pasaltha boral ta te sunna hun hman ani a, Pasaltha la dama te zahna chibai buk bawk niin Kolasiba mi chhuanawm te hnenah chawimawina hlan bawk a ni.

Chawhnu lamah ‘Ram leh Hnam Humhalh’ tih thupui hmangin Pu R.Tlanghmingthanga leh Dr.C. Lalmuankima, Principal GKC ten zirlai kalkhawm te hnenah zirtirna an pe a, he hunah hian Kolasib khawpui chhunga zirna hmun hrang hrang atangin zirlai an kalkhawm ani.