Mizoram State Planning Board chuan vawiin khan an chairman Chief Minister hovin CM Conference Hall-ah thu pawimawh relin an thukhawm.

Vawiin meeting-ah hian August ni 8, 2019 a State Planning Board sawrkarin a din thar hnu a hma lo lak tawhna te sawi a ni a. Planning department kaltlanga hna thawk department hrang hrang zinga pariat chu Board in a lo kawm tawh thu te sawi a ni. Project kallai mek zingah chhan hrang hrang vanga a hun taka thawh zawh loh, delayed projects awm tam lutuk chuan project thar dil kawngah harsatna a siam thin thu sawiin, vawiin meeting chuan hmalak zelna turah delayed project a awm tawh loh nan leh uluk zawka thawh a nih theih nan invil kawnga hmala turin thutlukna a siam a. Monitoring and vigilance lama hma la tur committee din tum a ni. Hemi hian department hrang hrang hmalakna, an tum inang reng si mahse project hrang daih a hna thawh (duplicity of works) awm thei te veng in, tul lova sum leh tha sen ral a veng dawn a ni.

State Planning Board ah hian member pariat awmin, vawiin hian Vice-Chairman H. Rammawi, Finance Commissioner Pu Vanlal Chhuanga, Planning Secretary Dr. C. Vanlalramsanga leh Non-official members Ex-Minister Pu Liansuama, Pu Lalthansanga (MFAS Rtd.) leh Pu N. Zokunga (MCS Rtd.) bakah Planning Department official te an tel a ni.