Vawiin chawhma dar 11:00 khan Serchhip District Child Protection Committee chu an chairman Pi Sangchhin Chinzah, District Bawrhsap hovin a pisa-ah an thukhawm a. An hmalak tawhna hrang hrangte thlir letin hmachhawp thar an neihte an sawi ho.

Chairman Pi Sangchhin Chinzah chuan Serchhip District chu district vannei tak kan ni, sawrkar department hrang hrang enkawltu officer tha tha tak tak ten mahni hna taima takin an thawk tlang a, Child Protection Officer pawhin taima taka hna thawkin a hna a tlin hle a, naupangte himna atana hmalakna kawngah an thawk tha tawk hle, a ti.

Pi Lalsiampuii Tochhawng, District Child Protection Officer chuan an department hmalakna hrang hrangte sawiin, District Child Protection Unit thil tum ber chu Juvenile Justice (Care and Protection of Children) Act tihhlawhtlin a nih thu sawiin; naupang kum 18 la pum hlum lo te kawng chi hnih - naupang enkawl leh venhim leh naupang dan kalha che te buaipui a nih ber thu a sawi.

Child Protection Service hnuaiah hian Committee pathum awmin; Child Welfare Committee (CWC) chuan naupang enkawl leh venhim ngaite chungchang ngaihtuahin chawlhkar tin Thawhlehni leh Zirtawpni apiangin an thukhawm thin a. Kum 2012 atanga 2019 September thleng hian case 437 an ngaihtuah tawh a ni. Member pathum awmna Juvenile Justice Board chuan naupang dan bawhchhiaa puhte chungchang ngaihtuah ve thungin kum 2012 atanga 2019, September thla chhung hian case 201 an ngaihtuah tawh a, Special home naupang pathum an dah mek a ni. Tin, Committee peng pakhat Special Juvenile Unit a la awm leh bawk.

Serchhip District ah hian naupang enkawl leh venhim ngaite leh naupang thil sual tia puhte awmna tur Child Care Institution pathum a awm a. Zoar Urban Deprived Children’s Home ah mipa naupang 10 leh hmeichhe naupang 8 an awm mek a. Unity Orphanage Home ah mipa naupang 7 leh hmeichhe naupang 6 an awm mek bawk. Naupang thil sual tia puhte awmna tur Observation Home pakhat an neih ah hian kum 2016 August atanga 2019 September thleng hian naupang 63 an enkawl tawh a, an zavai hian an case tihfel sak tawh niin, tunah chuan naupang enkawl an nei rih lo a ni.

Naupang harsa te chhawmdawlna atan Sponsorship an pek thin chu 2012 atanga 2019 January thleng khan naupang 212 hnenah an pe tawh a. thla tin naupang pakhat hnenah Rs. 2000/- an pe thin a. Kum 2019-2020 financial chhung hian naupang 41 hnenah sponsorship hi an pe mek bawk.

District chhung Village Council tinah Village Level Child Protection Commiittee din vek tawh niin, DCPU hian kum tin khua zawng zawng an tlawh kim vek thin a. Zirna in zawng zawngah naupangte himna atana hmalakna kawng hrang hrangin an nei a, Nodal Teacher for Protection of Child Rights ruat vek an ni. Naupangin midang hnena an sawi ngam loh an thlen ngamna tur Happy and Sad box pawh school tinah an dah a ni bawk. Child friendly corner chu Serchhip Police Station ah siam tawh niin, Thenzawl leh N. Vanlaiphai Police Station bakah District Court ah dah belh tuma hmalak mek a ni a bawk a ni. District Hospital ah naupang medical examination neih dawnin naupangte nihna midangin an hriat mai loh nan naupang lo awm lailawkna tur hmun lo buatsaih turin Hospital lam thuneitute beisei an ni bawk.

District Level Meeting hi quarterly in neih thin nise, an ti bawk.

He Meeting ah hian Pu Sathiyasundaram, IPS, SP, Serchhip bakah member te an tel kim a ni.