Kumin fur ruahtui tam avanga Lunglei District chhunga chhiat tawk chhungkuate tanpuina TATA Trust's North East Initiative Development Agency (NEIDA) te buatsaih chu vawiin khan DC's Conference Hall Lungleiah District Disaster Management Authority te huaihawtin sem a ni.

Tanpuina semna inkhawm tawi neih niin Pu Lalnundika SDO (Sadar) Lungleiin a kaihruai a, Lunglei Bawrhsap Pi K. Lalrinzuali chuan NEIDA leh tlawmngai pawl dangte inpekna leh hmalakna chu fakawm a tih thu a sawi a, Sawrkar anga hmalakna leh tanpuina chu an tih tur a nih anga ti an nih mai thu sawiin chumi piah lama pawl leh mimal anga Lunglei District chhunga chhiat tawkte tanpui a ni thin chu lawmawm a tih thu sawiin NEIDA ten thingtlang mi harsate dawm kanna hna kawng hrang hranga an thawk thin chu ropui a tih thu a sawi a ni.

NEIDA Programme Officer Pu James Lalthansanga pawhin NEIDA nihphung leh hmalakna hrang hrang sawiin thlai huan siam, ranvulh leh infiamna lam bakah mitinin tui thianghlim intur an neih theihna tura hmalak chu NEIDA hna ber a nih thu a sawi a, hemi kawngah hian Mizoram chhunga khaw 9000 vel an tuam tawh thu a sawi lang bawk a ni.

Vawiina chhiat tawk chhungkuate tanpuina semah hian In luah tlak loha chhia chhungkaw 22 te hnenah Tui tihthianghlimna Filter, Silpouline leh Buhfai bakah Rangva pek an ni a, leikhi leh min avanga in chhia chhungkaw 13 te hnenah Tui tihthianghlimna Filter, Silpauline leh Buhfai pek an nih bakah Branch YMA, Tlabung-te hman turin Life Jacket 10 hlan an ni bawk.

He tanpuina sem inkhawm hi Pu Lalsanglura Sub Deputy Commissioner, Nodal Officer DM&R chuan lawmthu sawiin a ti tawp a ni.