New Delhi-a cham mek Health & Family Welfare, Higher & Technical Education leh Commerce & Industry Minister Dr.R.Lalthangliana, chuan ni 25th September, 2019 (Nilaini) khan Union Minister for Health & Family Welfare, Dr. Harsh Vardhan hmuin Zoram Medical College-a boys& girls hostel leh faculty quarters chungchangte, Mental Hospital din tur chungchang leh district hospitals tihchangtlunna turte a sawipui a. Heng bakah hian ‘Ayushman Bharat’ hnuaia PMJAY Scheme-a chhungkaw pakhat premium Cheng 1052/- hi Mizoram tana a beitham thu leh AB-PMJAY 2nd Policy-ah chuan ennawn a ngaihthute a thlen bawk.

Nimin ni 26 September, 2019 (Ningani) khan Health & Family Welfare Minister Dr.R.Lalthangliana chuan Union Secretary for Tribal Affairs Pu Deepak Khandekar hmuin Zoram Medical College-a Boys & Girls Hostel sakna tur bakah Mizoram chhung leh pawna Mizo zirlaite mamawh hostel sak a ngaih thute a thlen. State dang aia Mizoram hma a lak that avangin Mizoram mamawhte phuhruk tura an inhuam reng thu Union Secretary Pu Deepak Khandekar chuan a lo hrilh. Heng bakah hian Tribal Affairs Ministry atanga scheme hrang hrang hnuaia hmalakna tur sum dah a tlem thin thute a sawipui bawk.

Higher & Technical Education Minister a nihna angin Dr.R.Lalthangliana chuan Union Secretary for School Education & Literacy, Ms. Reena Ray, IAS, pawh hmuin, Union Secretary hian Mizoram tan CSS Hindi Teacher sang chuang lakna tur an peih tep thu a lo hrilh. Minister hian Pu S.S.Sandhu, IAS, Addl. Secretary for Higher Education leh Pu J.C.Hosur, Joint Secretary, Ministry of HRD te pawh hmuin, kum 10 kal ta atanga buaipui tawh Mizoram University Southern Campus, Lunglei-a dah tum chungchang te, Mizoram University (MZU) tihchangtlun nana HEFA loan cheng vaibelchhia 153 zet leh NEHU leh hmun danga thawkten House Rent Allowance (HRA) 20% an lak laia MZU hnuaia thawktuten HRA 10% chauh an lak thute a sawipuiin, 20% HRA hi a rang thei ang bera MZU hnuaia thawkte pawhin la ve turin a thlen nawn leh a ni.

Dr. R. Lalthanglianachuan Ministry of Health & Family Welfare (MoHFW)-a Director General for Health Services (DGHS) Dr. Sanjiv Tyagi bakah Dr. V.G.Somani, Drugs Controller General of India, Dr. Manju Bala, Deputy Director General (M) leh Dr. Inder Prakash, DDG(PH) te nen hriselna zawna Mizoram mamawh hrang hrang an sawiho. Lung leh cancer lam natna enkawlna Mizorama tihchangtlunna tur leh District hospital hrang hrangah Emergency Care a that zawkna tur bakah Food & Drugs Testing Laboratory Mizoram chhim lama din belh a tul thu te sawi ho a ni. Anni hian kum reilote hnuah Zoram Medical College hi Specialist (Post Graduate) zirna atana tihchangtlun chhoh a ni theih dan tur an lo sawipui bawk.

Hemi ni vek hian Health Minister hian Union Secretary for DoNER, Dr. Inderjit Singh nen Mizoram hmasawnna tura Project hrang hrang, Zoram Medical College-a quarters leh infrastructure dangte, Mental Hospital dinna tur leh project dangte an sawiho.

Vawiin ni 27th September, 2019 (Zirtawpni) khan Higher & Technical Education Minister Dr.R.Lalthangliana chuan Jawahar Navodaya Vidyalayas (JNV) Commissioner Dr. Biswajit Kumar leh General Manager Mr. Sanjiv Kumar te hmuin Mizorama hmun thenkhata JNV din tawhte hmalakna mumal loh chungchangah uluk taka chhui chiang turin leh Mizoram district dang JNV la awm lohnaah pawh din belh tul a tih thu a thlen nghal.

Hemi zawh hian Health Minister chuan World Bank-a official-te nen an pisaah Mizoram Health System tihchangtlunna turah malakna turte sawipuiin, tehna hrang hrangah Mizoram chuan tihthatna lai nei mahse, HIV/AIDS leh nausen thi leh nau chunga thihna te tun aia tihniam tur chuan nasa lehzuala health system tihchak a ngaihthute a sawipui a. World Bank hotute chuan theihtawpa hma an lakpui tur thu an lo hrilh a ni.

Commerce & Industry Minister a nihna angin Dr. R. Lalthangliana chuan Addl. Secretary for Commerce & Industry Mr. Rakesh Sarwall leh official pawimawh tak takte nen pawh inkawmna neiin, Indo-Bangla border-a Kawrpuichhuah leh Indo-Myanmar border-a Zokhawthar leh Zochachhuah-a hmalakna muangchang lutuk chungchangah chak taka hma la turin a ngen a. Mizoramah rawn zinin, a hmun ngeia hmalakna turte rawn en turin a chah bawk. Minister hian mi pawimawhte a hmuhnaah hian Pu Ajay Chaudhury, Resident Commissioner, Mizoram House, New Delhi leh official dangten an tawiawm a ni.

Minister Dr.R.Lalthangliana hian Bureau of Parliamentary Studies and Training, Lok Sabha Secretariat, New Delhi-a training nei mek I&PR Officer 6 leh Mizoram Journalists Association member 15-te tan nizan khan Mizoram House-ah zanriah a buatsaih sak bawk a ni.