Vawiin khan Mizoram Board of School  Education (MBSE) buatsaihin Downtown English School, Lawngtlaiah Lawngtlai District chhunga High School leh Higher Secondary School zirtirtute tan kum 2020 HSLC leh HSSLC exam atanga hman tan tur exam dan kalphung leh zawhna siam dan thar (question setting technique) chungchangah ni khat awh training buatsaih a ni.

He training-ah hian MBSE siam kum 2020 Board Exam atanga hman tan tur Scheme of Examinations and Question Design bakah, Integrated Evaluation Scheme (IES) software update thar leh software manual chungchang zir ho nghal a ni bawk.

India ram pum huap zirna leh hna hrang hranga inelnaah tun aia Mizo zirlaite an lan tam zawk theihna tur zir chianna hrang hrang neih a nih hnuah, exam zawh siam dan hian pawimawhna thuk tak a nei tih hmuh chhuah a ni a. Hei vang hian MBSE chuan kum 2020 HSLC leh HSSLC exam atanga hman tur exam dan kalphung leh zawhna siam dan thar a duang a. Hemi zulzui hian kumin atangin zirtirna pawh kalpui tan a ni.

Kalphung tharah hian a bu chhung thu ngawr ngawr bakah zirlaite'n ngaihtuahna an sen zau theihna tur zawhna tam zawk siam a ni tawh dawn a. Hei hian zirlaite chu an ngaihtuahna hman thiam kawngah leh an hma lam huna inelna hrang hrang an hmachhawn tur atan te a puih theih ngei beisei a ni.

MBSE Aizawl-a Academic Officer Pu Michael Lalrinmawia leh MBSE Lunglei-a Regional Officer Pu F. Ricky Lalremruatpuia te’n training hi an pe a. Kum hmasa lam atanga hman tawh IES software tha leh zuala thuam that chu a hman dan (user manual) nena sem nghal a ni. 

Vawiin training-ah hian Lawngtlai District chhunga High School leh Higher Secondary School zirtirtute an tel tha hle a. Training hi Aizawl, Mamit, Kolasib, Champhai, Lunglei leh Siaha District-ahte neih tawh niin, vawiina Lawngtlai District-a hman bakah hian, kar leh lamah Serchhip District-ah pawh la buatsaih ve leh tura ruahman a ni bawk.