1486/2022-2023

Vawiin khan Home Minister Pu Lalchamliana chuan Chanmari YMA Hall-ah Tuichangral Zirlai Pawl te buatsaih Freshers Social leh zirlai tithate chawimawina hun a hmanpui.

Pu Lalchamliana chuan Tuichangral Zirlai Pawlin an hun pawimawh tak hmanpui tura an sawm chu lawmthu sawiin zirlai kalkhawmte hnenah anmahni, chhungkua leh khawtlangah a tha zawnga danglamna thlen tura an rilru siam thar theuh turin a fuih. Zirna chu mi puitlinga min siamtu, he khawvela kan damkhaw chhuah theihna tura kawng min kawhhmuhtu a ni a, thiamna a san poh leh ramin hma a sawn thin, a ti a. School leh college atanga thiamna an puakchhuah hmangin khawvelah mahni ke a ding thei tura hmalam thlir tur te, Mizoram Sawrkar hnuai chauha hna dil lo a, Central Sawrkar hnuaia hna tha tak tak awm te thawh tumin a fuih a. Lehkhathiam an nih angin thil dik leh leh dik lo finfiah ching mi, mi tu emawin ngaih dan chak tak an vawrh darh avanga awih ngawt loa thu dik leh dik lo thliar thiam a, power of reasoning leh analysis hmang thiam mi ni turin Home Minister chuan kalkhawm te a chah a ni. 

Hrangturzo bialtu MLA Pu Lalchamliana chuan Tuichangral Zirlai Pawl te nen an bial chhung zirna tihhmasawnna kawngah leh hmasawnna (development) hna thawh tha zawk leh chak zawka a kal theihnan hma an la ho thin tih a sawi a. Bial chhunga hmasawnna hna thawh te a tha tawk em tih uluk leh taima taka an vil thin chu lawmawm a tih thu a sawi. Mizoram Sawrkar budget a awm lo Central Sawrkar atangin SASCI kaltlangin Mizoramin sum a hmu a, heta tang hian an bial chhung inkalpawhna kawng chei that hna thawh a ni ang, Minister chuan a ti bawk. 

Vawiin programme hi TCZP Asst. General Secretary Laltluangkima'n a kaihruai a.  Pu David R.Lalsawmtluanga, Liando Auto Works proprietor chu khualzahawm a ni. Kum 2001 atanga 2022 chhunga pawl 10 Atanga MA thleng result chhuaka hlawhtling te hnenah lawmpuina thuziak an hlan a. An bial chhunga mi hmingtha chawimawi tlak te chawimawina hun an hmang bawk. Khualzahawm Pu David R.Lalsawmtluanga hian zirlaite fuihna thu a sawi a, TCZP President Pu R.Lalmawizuala'n thusawina hun a hmang bawk a ni. 

Tuichangral huam chhungah hian khaw 14 - Bawktlang, Biate, Chekawn, E.Lungdar, Hmunzawl, Khawlailung, Leng, Lungchhuan, Lungkawlh, Mualcheng, N.Vanlaiphai, Piler, Sailulak leh Sialsir khua te a awm a ni.